Buddiest Community in DC

Бурхан Багшийн Их Дүйчин Өдөр - Бурхад залaхуй дор
Эрхэм хүндэт та бүхэндээ удахгүй тохиох Бурхан Багшийн Их Дүйчин Өдрийн мэндийг хүргэн мэндчилж байна.
Вашингтон ДС хот орчмын бурхны шашинт Монголчууд бидний хувьд буян номын хур тасралтгүй үргэлжилсээр...
Монголоос Гандантэгчилэн хийдийн гавж Д.Лувсанжамц багш маань дахин морилон ирж, ДС хот орчим үүсгэн байгуулсан Монголын бурханы шашины соёлын төвийнхөө үйл ажиллагаагаа идэвхитэй үргэлжлүүлэн, бидэнд бурхны шашны зан үйл, ёог, хичээл сургалтаа дахин тогтмол зохион байгуулж эхэллээ.
Тэрээр ирэхдээ 108 аюуш бурхдыг бүтээлгэн, аравнайлуулан авчирсан нь ДС хот орчмын монголчуудын төдийгүй, нийт бидний оршин суугаа энэ газар орон хийгээд энд оршин суугаа бүхий л зон олонд урт нас удаан жаргал, ач буянаа хайрлах билэг дэмбэрэлтэй сайхан завшаан хэмээн хүлээн авч цаглашгүй наст Авид бурхны хувилсан дүр, Аюуш бурхнаа гэртээ заллаа.
Бурхад хир буртаггүй, ариун сайхан газар цуглардаг гэдэг, тэр ч утгаар бурхан залахдаа монголчууд бид өөр өөрсдийн боломжоор гэр орон хот хүрээгээ цэвэрлэн ариун сайхан арц хүж зул өргөн , амьд цэцэгс алив сайхнаа дэлгэхээс гадна хамгийн гол нь сэтгэлийн хир буртгаа арилган амар амгалан сайн сайхан бүхнийг билэгдэн ерөөл өргөн залдаг уламжлалтай.
Хүн ямар ч зүйлсийг хийж бүтээхдээ тэр хийх гэж буй ажлаа мэдэж, сурч байж илүү амжилттай зүйл хийдэг . Мэдээж бурхад бүтээхийн тулд ч тэр хийх гэж байгаа бурхдаа судалж мэдэж байж илүү амьтай сүнстэй, сүсэгтэй сүжигтэй, сайхан бүтээл туурвина. Миний хувьд, уран бүтээлч хүний хувьд энэ сайхан өндөр гэгээний сургууль хийцээр бүтээсэн бурхдыг хараад өөрийн эрхгүй сэтгэлд бишрэл, хүндэтгэл төрөн дээж бүтээлээс залж буй нь энэ.
Оюун ухаант хүмүүн бид эерэг сайхан зүйлсийг сэтгэлдээ байнга бодон түүнийгээ давтамжтай дадал болгон амьдралдаа хэрэгжүүлснээр, тэр нь бие хэл сэтгэлд баттай сууснаар бидний алхам бүрд гүн ач тусаа хүргэн бидний хүсээд байгаа жинхэнэ сэтгэлийн амар амгалан, сайн сайхан амьдралыг бэлэглэдэг гэдэг.
Сэтгэлд юу дадуулна тэр нь улам үржиж олширдог ч гэдэг. Сайхан сэтгэлийг дадуулан, нинжин сэтгэлийг үүсгэснээр хүмүүн уур, мунхаг, шунал хэмээх нисваанисын гурван хорноос ангижирч амар амгаланд хүрэх үүд хаалга нээгддэг тухай бурхан багшийн сургаалд тодорхой сургадаг.
Хүн болж төрнө гэдэг ховор аз завшаан, энэ л ертөнцөд хүн болж төрсний хэрэг юу билээ хүмүүн заяагаа хайрлах хэрэгтэй, өөрийгөө хайрладаг хүн бусдыг хайрлана, аав ээж, үр хүүхэд хань ижлээ хайрлана. Тэр хайр тэлсээр найз нөхөд, хамт олон нутаг ус улс орноо хайрладаг болох нь мэдээж. Тэр хайр улам үржиж дэвжиж байгаль эх дэлхийгээ, хүн зон олноо, хорвоо ертөнцөө бүхэлд нь хайрлах нинжин сэтгэлтэн болгоно. Ийм л сэтгэлийг хүн бүр өөр өөртөө үүсгэх аваас бид хийгээд эх болсон зургаан зүйлийн хамаг амьтад энх амгаланд оршино.
Энэ бүхнийг өнөөгийн нийгэмд зөвхөн бурхны шашин ч гэлтгүй бүхэл шашин, улс үндэстэн, хувь хүн болгонд хэвшүүлж дадуулахыг хичээж байна. Мэдээж хүн бүр амгалан бол гэр орон амгалан, гэр орон амгалан бол улс үндэстэн улмаар хорвоо ертөнц амгалан байна. Үүний тулд л эрдэмтэн мэргэд ихэс дээдэс бид бүхэнд сургаал номоо хайрлаж байдаг. Тэгэхээр хүн болгон хичээж, сэтгэлдээ сайн сайхны үрийг суулган, түүнийгээ дадуулан үржүүлэн өсгөж чадваас хүсээд байгаа энх амгалан эрүүл энх юу санaсан бүхэндээ хүрч чадах нь.
Бурхад зална гэдэг нь бурхадтайгаа харьцаж энэ бүгдийг бясалган бодож, дадуулахыг хэлнэ гэж ойлгодoг.
Энэ бүтэн сайнд буюу 6-р сарын 4-ний бэлэгт сайн шинийн арван тавны өдөр Бурхан багшийн гурван их үйл явдал давхацсан их дүйчин өдөр тохиож байгаа.
Бурхан багшийн их дүйчин өдөр хийсэн, бүтээсэн буян бүхэн бумантаa үржиж дэлгэрдэг гэдэг.