Алгыста ылыныах

Алгыс – аал уокка ыс диэн өйдөбүллээх. Аал уот диэн тыл улахан сүүнэ диэн суолтаҕа туттуллар. Киһиэхэ аал уот иччитэ олус чугас буолар. Ол иһин киһи аал уотугар, аһыыр аһыттан бэрсиэхтээх уонна үһүс халлааҥҥа олохтоох Дьөһөгөй Айыыга уот нөҥүө кымыһынан айах тутуохтаах. Ону аал уот олус күүскэ ылынар.
Алгыс тылын, тыллары сааһылаан, бэйэ-бэйэлэригэр дьүөрэлээн саҥараллар. Алгыс этэн, аал уот иччитин аһатан, ол нөҥүө иччилэргэ, айыыларга тахсаҕын. Өскөтүн айыылар ылыннахтарына, этиллибит тыл туолар. Ол аата алгыс айыылартан тутулуктаах.
Биһиги «айыы оҕолоро» буолабыт. Ол быһыытынан орто туруу дойдуга олох олорорбут, киһи буолар кэскиллэнэр кэммит алгыс нөҥүө үөһээ үрдүк айыылартан көрдөһөрбүт-ааттаһарбыт дьайыыта буолар. Былыр-былыргыттан, урааҥхай саха Орто дойдуга олохсуйуоҕуттан ыла, алгыс тыла дириҥ ис хоһоонноох. Тыл сүмэһинэ, тыл арааһа, кэрэтэ барыта алгыска түмүллэр. Алгыһы, айылҕа тыыныгар сөп түбэһиннэрэн, этиҥ-хааныҥ аһыллан, кырдьаҕас киһини кытта кэпсэтэн эрэр курдук оргууй, наҕыллык, ыксаабакка эрэ толоруохтааххын. (А.С. Федоров: Өбүгэ сиэрэ-туома, 2011)
Эһиги билигин көрөҕүт көрдөһүү алгыһын.