Кыайыы 76 сыла

*Кыайыыны уhансыбыттарга - эҕэрдэ!*

1941 сыл... Самаан сайын үгэнэ...
Айгыр-силик айылҕа
Көҕөрө-тыллан уhуктуута,
Дьон-сэргэ мунньустан
Тунах ыhыах ыhыллар.
Үөрүү-көтүү үгэнигэр,
Эмискэ этиҥ эппитинии,
«Сэрии, сэрии буолла!” – диэн Суостаах сурах кэлбитэ.
Соhуйан, мах бэрдэрэн,
Чочумча таалан туран,
Ыhыах дьоно ыhыллан
Аргыый сэмээр тарҕаспыта.
Туруук-толуу эр дьоммут,
Сааhын сиппит ыччат оҕо,
Биир-биир бэбиэскэ тутаннар
Хомуур ахсын бараллара.
Аҕа дойдуну көмүскүү,
Дьоллоох олох туhугар,
Аҥардас Таастаах нэhилиэктэн
Элбэх эр бэрдэ барбыта.
Эргэ трибуна аттыгар мустан
Алгыс тыл этиллэр, кэс тыл кэпсэнэр:
«Сидьиҥ өстөөҕү ситэн сиҥнэрэн,
Төннөөрүн, төрүт буоргутугар!».
Барар кэм тиийэн кэлбитэ,
Бырастыылаhыы, хараастыы...
Ботуоҥка сүгэннэр айан суолунан
Ким атынан, ким сатыы барбыта.
Чочумча буолаат, кэннилэрин хайыhан
«Эбэ» күөллэрин одуулаан иhийбиттэрэ.
Оо, ол мүччүргэннээх түгэҥҥэ
Үгүhү да санаан аастахтара...
Сэрии хаҕыс тыына, хаhыҥа Хаарыйбыта хас биирдии ыалы,
Ыалтан 3-түү, 4-түү киhи
Уоттаах сэриигэ туруммута. «Дьуолуматтан» Кырбаhаанкыннартан
6 уол, 4 күтүөт барбыта.
«Хардыы колхозтан» Ньукулаайаптар
4 ыччаты ыыппыттара.
Оттон тыылга хайдах этэй?
Сут-кураан дьыллара буоланнар,
Олох олус кытаанаҕа,
Ас-таҥас суоҕа, тиийбэтэ
Оҕону-дьахтары кыhарыйара.
Бурдук ыhыыта, от хомуура
Кыһыны туоруур кыһалҕа...
Күнүс сынньаммакка, түүн утуйбакка
Түбүктээх үлэҕэ умсаллара.
«Барыта – фроҥҥа,
Барыта – Кыайыы туһа!» – диэн девиз
Ыал ахсын сүрүн сорук буолбута.
«Өлөнтүнэн», «Дьуоллуманан», «Дэгийэнэн»
Ким – куобах үтүлүк, ким - кээнчэ тигэрэ.
Сэрии – өлүү диэн тугун,
Этинэн-хаанынан билэннэр,
Этэҥҥэ эргиллэн кээлтэрэ,
Барбыт дьонтон аҥаардара эрэ.
Эһигинэн – өлүүнү кыайбыттарынан,
Эһигинэн – олоҕу тилиннэрбиттэринэн,
Киэн тутта, кэрэ кэпсэл оҥостон,
Кэнчээри ыччаппытыгар тиэрдэбит.
Кыайыы өрөгөйүн өрө ууммуттары,
Уоттаах сэрии, тыыл ветераннарын,
Улуу Кыайыы 76 сылынан Уруйдааммыт чиэстиибит!
Улуу Кыайыыны уһансыбыттарга
Уруй-айхал, нөрүөн-нөргүй!

Михайлова Софья, Таастаах, 2021с.