Milli Məclis Ali Baş Komandan İlham Əliyevə və Azərbaycan xalqına müraciət edib

Milli Məclisin payız sessiyasının növbəti plenar iclası keçirilib.

APA TV-nin xəbərinə görə, iclasın gündəliyinə “Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevə və Azərbaycan xalqına Azərbaycan Respublikası Milli Məclisinin Müraciəti haqqında” məsələ daxil edilib.

Sədr Sahibə Qafarova bildirib ki, bu günlərdə Azərbaycan xalqı 30 ildir həsrətlə gözlədiyi günləri yaşayır. Hər kəs bilir ki, müharibə itkisiz olmur və biz də bu müharibədə itkilər verdik.

Sonra şəhid olmuş insanların xatirəsi Milli Məclisdə bir dəqiqəlik sükutla yad edilib.

İclasda bu ilin 8 may tarixində - Şuşanın işğal günü Milli Məclisdə çıxış edən şuşalı Əsra Məmmədli də iştirak və çıxış edib: “Artıq hamı bilir, bütün dünya bilir ki, işğala son qoyuldu. Azərbaycan xalqı öz torpağına sahib çıxdı. Allahdan şəhidlərimizə rəhmət diləyirik. Ali Baş Komandan bizi doğma torpağımıza qovuşdurdu. Bayrağımız Cəbrayılda, Zəngilanda, Füzulidə və bütün Azərbaycan torpaqlarında dalğalanır. Artıq mən qaçqın deyiləm. Öz evimə qayıdıram”.

Milli Məclisin komitə sədri Səməd Seyidov bildirib ki, illər boyu parlamentdə sazişləri təqdim edəndə onların sonuncu səhifəsində hər zaman qeyd-şərt olurdu, onlar bizə bunu qəbul etdirməyə çalışırdılar. Amma bu dəfə bu olmadı: “Artıq heç vaxt parlamentdə sənədlərdə o qeyd-şərt yazılmayacaq. Bunu edən Ali Baş Komandan İlham Əliyevdir. Bu gün Şuşamız azaddır, Kəlbəcər, Laçın və başqa rayonlarımız azaddır. Tam şəkildə Azərbaycanın ərazi bütövlüyü bərpa olundu. Bu qələbə Azərbaycan liderini tarixdə ən yüksək səviyyədə olan liderlər cərgəsinə daxil etdi. Bu qələbə dünya tarixində qalib gəlmiş ölkələrin, xalqların içərisinə Azərbaycanın adını qızıl hərflərlə yazdı. Bu qələbə haqda millət əbədi danışacaq. Bu, Azərbaycanın əbədi qızıl tarixidir”.

Müstəqilliyimizi doya-doya yaşamağa Qarabağ probleminin mane olduğunu deyən komitə sədri Tahir Mirkişili isə bildirib ki, Azərbaycan iqtisadiyyatı da bu döyüşdə qalib gəlib, Ermənistan isə ən az 30 il geri düşüb.

Deputat Cavid Osmanov isə Azərbaycanın həm döyüş meydanında, həm də diplomatiyada qələbə qazandığını deyib: “Bu döyüşlər bir daha onu göstərdi ki, Azərbaycan xalqı milli məsələlərdə birdir. Bu qələbə daha güclü Azərbaycan qurmaq üçün əvəzedilməzdir. Bu uğurun əsas müəllifi Ali Baş Komandan İlham Əliyevdir. Bundan sonra əsrlər keçsə də, Prezidentimiz Azərbaycan tarixində əvəzedilməz sərkərdə kimi yaşayacaq”.

“Artıq dünya mətbuatında hərbi ekspertlər Azərbaycanın nailiyyəti barədə fikir mübadiləsi aparır”, - deyən deputat Vahid Əhmədov hesab edir ki, üçtərəfli bəyanatda Ermənistanın faktiki olaraq ərazilərdən çəkilməsi barədə faktlar əksini tapıb. Sənəddə statusun olmaması isə olduqca əhəmiyyətlidir: “44 gündə bizimlə birlikdə olduğu üçün Türkiyəyə, Türkiyə Prezidentinə, Pakistana və yanımızda olan bütün ölkələrə, ölkə başçılarına təşəkkürümü bildirirəm”.

Deputat Fazil Mustafa da səfir Polad Bülbüloğlunun açıqlamalarına münasibət bildirərək deyib ki, bu gün heç bir köhnə tezis qüvvədə deyil. Qarabağ Azərbaycandır! və bu, belə də qalacaq.

Şuşa şəhərinin ən yüksək yerlərindən birində xilaskar əsgərimizə abidə qoyulmasını təklif edən deputat Elman Nəsirov hesab edir ki, bu tarixi qələbənin birinci qəhrəmanı Ali Baş Komandan İlham Əliyev, şanlı qələbəyə imza atan isə Ordumuzdur: “Ordumuz sözün həqiqi mənasında xarüqələr yaratdı, tarixi qələbəni bizə yaşatdı. Şəhidlərimizin qarşısında baş əyirik, qazilərimizə hörmətlə, izzətlə yanaşırıq. Təklif edirəm ki, müəyyən vaxtdan sonra, uyğun şərait yarananda parlamentin iclaslarından biri Şuşa şəhərində keçirilsin. İşğaldan azad olunmuş torpaqlarla bağlı qanun layihələrini Şuşada qəbul edək”.

Deputat İsa Həbibbəyli də bildirib ki, Ali Baş Komandan həm siyasi-ideoloji cəbhədə, həm diplomatiya cəbhəsində qələbə qazanıb.

İclasın sonunda Milli Məclis Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevə və Azərbaycan xalqına müraciət edib. Müraciət səsə qoyularaq qəbul edilib.

#apatv #apaxeber

[iqrarbabayev]

ALLAH CƏNAB ALİ BAŞ KOMANDAN İLHAM ƏLİYEV VƏ AİLƏSİNİ QORUSUN AMİN