MİLLİ MƏCLİS XARİCDƏKİ SOYDAŞLARIMIZI DAHA SIX BİRLƏŞMƏYƏ ÇAĞIRIR

Milli Məclisin bu gün keçirilən plenar iclasında “Azərbaycanın Əfqanıstanda səfirliyinin təsis edilməsi haqqında” qanun layihəsi müzakirə edilib. Layihəni parlamentin Beynəlxalq münasibətlər və parlamentlərarası əlaqələr komitəsinin sədri Səməd Seyidov təqdim edib. Bildirib ki, bu qanun layihəsi həddindən artıq vacib və strateji əhəmiyyət kəsb edir.
Millət vəkilləri məsələ ilə bağlı fikirlərini bildiriblər. Müzakirələrdən sonra qanun layihəsi səsə çxarılaraq qəbul edilib.
Plenar iclasda ilk dəfə olaraq “Gender bərabərliyinin təmin edilməsinə nəzarəti həyata keçirən icra hakimiyyəti orqanının illik məlumatı haqqında” məsələ müzakirəyə çıxarılıb. Ailə, Qadın və Uşaq Problemləri üzrə Dövlət Komitəsinin hazırladığı məlumatı parlament üzvlərinə komitənin sədri Bahar Muradova təqdim edib. Qeyd edib ki, “Azərbaycanda gender bərabərliyi, həmçinin qadınların sülh və təhlükəsizliklə bağlı proseslərdə iştirakına dair fəaliyyət planı hazırdır. Hər iki fəaliyyət planı Nazirlər Kabinetinə təqdim edilib.
İllik məlumatın qəbulundan sonra Vergi Məcəlləsinə dəyişiklik, dövlət borcu haqqında və digər qanun layihələri də üçüncü oxunuşda təsdiqlənib. Payız sessiyasının sonuncu plenar iclasında deptatlar Dünya Azərbaycanlılarının Həmrəyliyi Günü münasibətilə Müraciət qəbul ediblər. Müraciətdə dünya azərbaycanlıları ümummilli dəyərlərimizin gerçəkləşməsi naminə daha sıx birləşməyə çağırılıb. Iclasda Parlament sədri Sahibə Qafarova Milli Məclis adından Prezident İlham Əliyevə və Birinci vitse-prezident Mehriban Əliyevaya təbrik məktubu göndərilməsi təklifi ilə də çıxış edib. Deputatlar spikerin bu təklifinə razılıqlarını bildiriblər. Sonda Dövlət Himninin səsləndirilməsi ilə Milli Məclisin payız sessiyası bağlı elan olunub.