Ua Molimau Atu Liae i le Taua o Tusitusiga Paia | 1 Nifae 5:10–22

Ua suesue e Liae papatusi apamemea ma faamaonia o loo i ai tusitusiga paia a Tagata Iutaia, e aofia ai faamaumauga o Atamu ma Eva ma tusitusiga a perofeta paia uma. O loo i ai foi le laina o le gafa o le aiga o Liae. Ua vavalo Liae o nei faamaumauga o le a manuia ai augatupulaga uma o ē tupuga mai ia te ia.

E faatatau i le 1 Nifae 5:10–22:
10 Ma ina ua uma ona laua tuuina atu o le faafetai i le Atua o Isaraelu, sa ave e loʼu tamā, o Liae, talafaamaumau sa togitogia i luga o papatusi apamemea, ma suesue i ai o ia mai i le amataga.
11 Ma sa vaai o ia, ua i ai tusi e lima a Mose, sa tuu mai ai se tala o le foafoaga o le lalolagi, faapea foi ma Atamu ma Eva, o e o o tatou uluai matua;
12 Ma se talafaamaumau foi o tagata Iutaia mai le amataga, e oo ifo lava i lalo i le amataga o le nofoaiga a Setekaia, le tupu o Iuta;
13 Ma valoaga foi a perofeta paia, mai le amataga, seia oo ifo i lalo i le amataga o le nofoaiga a Setekaia; ma le tele foi o valoaga na fetalaia e le fofoga o Ieremia.
14 Ma sa oo ina maua foi e loʼu tamā, o Liae, i luga o papatusi apamemea se gafa o ona tamā; o le mea lea na iloa ai e ia o ia o se e tupuga mai ia Iosefa; ioe, o Iosefa lava lea le atalii o Iakopo, o lē na faatau atu i Aikupito, ma o lē na faasaoina e le aao o le Alii, ina ia mafai ona faasaoina e ia lona tamā, o Iakopo, ma lona aiga uma mai le fano i le oge.
15 Ma sa taitaieseina foi i latou i fafo mai le faatagataotauaina ma i fafo mai le laueleele o Aikupito, e lena lava Atua e tasi o lē na faasaoina i latou.
16 Ma sa faapea ona iloa ai e loʼu tamā, o Liae, le gafa o ona tamā. Ma o Lapana foi o se e tupuga mai ia Iosefa, o le mea lea na tausi ai e ia ma ona tamā talafaamaumau.
17 Ma o lenei ina ua vaai loʼu tamā i nei mea uma, sa tumu o ia i le Agaga, ma amata ona vavalo e uiga i ana fanau—
18 E faapea o nei papatusi apamemea o le a oo atu i atunuu uma, ituaiga, gagana, ma nuu, o e e tupuga mai i ana fanau.
19 O le mea lea, na fai mai ai o ia o nei papatusi apamemea o le a lē faaumatiaina lava; pe toe faanenefuina e le taimi. Ma e tele mea sa valoia e ia e uiga i ana fanau.
20 Ma sa oo ina e oo mai i lea lava taimi o tausia pea e aʼu ma loʼu tamā poloaiga sa poloaiina ai i maʼua e le Alii.
21 Ma ua matou maua talafaamaumau sa poloaiina ai i matou e le Alii, ma matou suesueina i latou ma matou iloa ai ua manaomia i latou; ioe, ua aoga tele lava ia te i matou, ina ia mafai ai ona matou faasaoina o poloaiga a le Alii mo a matou fanau.
22 O le mea lea, o le poto sa i le Alii sa tatau ai ona matou ave o nei papatusi faatasi ma i matou, aʼo matou malaga i le vao agai i le laueleele o le folafolaga.