HULUSİ AKAR VƏ ZAKİR HƏSƏNOV BİRGƏ TƏLİMİ İZLƏYİB

“Türkiyə və Azərbaycanın Silahlı Qüvvələri malik olduqları təchizat ilə quruda, dənizdə, havada, qışda, yazda, dağda, düzənlikdə ona verilən bütün tapşırıqları yerinə yetirə biləcək gücdədir. Hər kəs türk millətinin müdafiəsi məsələsində Türkiyə və Azərbaycan Silahlı Qüvvələrinə güvənməlidir”. Bunu Türkiyənin milli müdafiə naziri Hulusi Akar Qarsda keçirilən “Qış-2021 Azərbaycan-Türkiyə Birgə Təlimi”nin yekun mərhələsində çıxışı zamanı deyib. Bildirib ki, Türkiyə və Azərbaycan qardaşlığının sadəcə sözdə olmadığını bir daha nümayiş etdirib.
Təlimin yekun mərhələsini Azərbaycanın müdafiə naziri Zakir Həsənov da türkiyəli həmkarı ilə birgə izləyib. Hər iki nazir təlim mərkəzində yaradılan şəraitlə tanış olublar. Burda əsgərlərin bişirdiyi çörəyin və yeməklərin dadına baxıblar.
Xatırladaq ki, fevralın 1-dən başlayan ortaq təlim çətin relyef və soyuq hava şəraitində keçirilir və fevralın 12-nə qədər davam edəcək. Təlimə Azərbaycan Silahlı Qüvvələrinin 66 hərbçisi qatılıb. Ümumilikdə manevrlərdə 1268 nəfərlik şəxsi heyət iştirak edir. Tapşırıqların icrasına F-16 qırıcıları və PUA-lar da daxil olmaqla 190 hərbi texika və 200-dən çox növdə silah cəlb olunub.