Саҥарар Былаас - Айан суола. Видео: Василий Лукачевский.

Дьокуускай куоракка дылы айаннаан иһэр суолга биһиги баҕа санааларбытын былааннаабыт тапталлаах суолбут буолар.
Хас биирдии ааһар алаас аатын да билбэтэрбин эн аттыгынан ааһан хас сыл аайы араас, бэйэ – бэйэлэригэр маарыннаабаты толкуйдаан иһэр этим мин!
Оҕо сылдьан куоракка киирэн иһэн компакт диска, компьютернай ылбыт киһи бэрт буолуо этэ диирим.
Абитураҕа куоракка киирэн иһэн тапталла булбут, ыллаабыт киһи бэрт буолуо этэ диирим.
Ол курдук хас биирдии турар тииккэ тиийэ, барытыгар мин олоҕум былаана олорон хаалбыт сирэ буолар ди.
Бу суол мин майгыбын оҥорбута.
Тоҕо диэтэр киһи үксүгэр айаҥҥа былаанныырын ордорор буолар.
Олох суола, эбэтэр олохпутун уларытар суол ити дьиэбититтэн дьоҥҥо тахсан баран айанныыр айаммыт суола буолар.
Мин туох баар санаам барыта эйиэхэ буолан ааспыта.
Дьокуускайы наһаа оннук сөбүлээбэппин, ити сиргэ толкуйдуурбун абааһы көрөбүн.
Онтон айаҥҥа толкуйдуурун быдан ураты түүннэри сытан ороҥҥо толкуйдуохтааҕар.
Айан бэйэтэ туспа магиялаах. Айаҥҥа хаалларбыт толкуйун туохха да тэҥнэспэт минньигэс уратылаах.
Телефонум геолокациятын көрдөрбүн мин айаҥҥа сылдьыбыт километрым сүрдээх кыра. Онтон сорохтор сири дойдуну бүүс бүтүннүү эргийэ сылдьан толкуйдууллар.
Хас биирдии сиргэ – уокка араас атын толкуйдарын толкуйдаан иҥэрэн хаалларбыттара, хас биирдии дойдуга кинилэр бэйэлэрин чуут атыннык, саҥатык ылынан ырытан ааһаллара.
Ол эрэн биллэн туран туох баар майгыбытын, былааммытын барытын оҥорбут сирбит – төрөөбүт дойдубут тас көстүүтэ, тымныыта уонна салгына буолар.
Ол иһин төрөөбүт дойдубутун хайдах баарынан таптыырбытын ойуулаан кэпсээтэрбит, дьиэтиттэн тэйиччи сылдьар киһи истэн хараастар, манньыйар уонна минньигэстии айманар. Тоҕо диэтэр иккиэн биир сиргэ бэйэбит былааннарбытын, майгыбытын оҥорон саҕалаабыт сирбит биир!
Ол сир ааттаах – Сахабыт сирэ диэн ытыктаан бары таптыыр ааппыт буолар! Төрөппүт ийэ биитэр аҕа курдук минньигэс биһиэхэ кини! Уонна хас биирдии сир уот бэйэлэрэ туспа былааннарын, майгыларын оҥорбут дьоннорунан баай буолар эбит!