Makrílbátur strandar í stórgrýttri fjöru við Keflavíkurhöfn

Makrílbáturinn Siggi Gísla EA 255 strandaði í stórgrýttri fjöru við Keflavíkurhöfn nú á þriðja tímanum. Hafnsögubáturinn Auðunn hefur náð bátnum af strandstað.

Sigga Gísla EA rak mannlausan frá bryggju í Keflavík og upp í stórgrýtta fjöruna.

Nokkrir makrílbátar eru á veiðum á þessum slóðum en engan grunaði að báturinn væri mannlaus og á leið upp í fjöru.

Lögregla kom fljótlega á staðinn. Línu var skotið frá nálægum makrílbát og í land og taug dregin yfir í Sigga Gísla EA.

Auðunn kom nokkru síðar á staðinn og var taug kastað þaðan yfir í hinn strandaða bát. Báturinn var dreginn af strandstað en þá slitnaði dráttartaugin og Sigga Gísla EA rak aftur upp í grýtta fjöruna.

Fljótlega gekk að koma taug að nýju í hafnsögubátinn og náði hann Sigga Gísla EA aftur í tog.

Ljóst er að báturinn er nokkuð skemmdur og leki kom að honum.