FALASTINGA - Akrom MALIK

Показать описание

FALASTINGA

Ey dunyoni lol qilgan millat!
Ey iymonning sobit sohibi!
Joning berib chekmading hasrat,
Hurriyatning haqli tolibi!

Yuzingdagi jasur tabassum
Zolimlarni solar titroqqa!
Farzandingni qon-la yo‘rgaklab,
Kulib tutding Ona Tuproqqa!

Yuzingdagi jasur tabassum
Dushman uchun eng xavfli tahdid.
O‘lim mening hayotim deding –
Yovlaringni qurshadi hadik.

Ey Allohning ismin hayqirib
Larza solgan ko‘klarga qadar,
Har takbiring zolim ko‘ksiga
Jahannamdek paykonlar qadar.

Ey olamga hurlik sabog‘in
Ayon etgan muhtasham millat,
Nabiyingdan jasorat olib,
Yer yuzida muhtaram millat!

Qul bo‘lmagin aslo insonga,
Bosh egmagin zolimga zinhor!
Hayot seni bag‘riga bosgay
O‘lim yo‘lin qilsang ixtiyor!..

Ey nabiylar diyori Quddus,
Ey ilohiy fayz yoqqan Aqso!
Sening tuning eng yorqin kunduz,
Kunduzlaring jannatdek raso!

Qo‘rquv, zulm to‘lgan dunyoni
Tiriltirdi sening hur sasing.
Robbim Senga yordam bersin va
Mangu sinsin zulm qafasi!

2021 yil, 13 may
Akrom MALIK