Ua Valoia e Iesu Keriso le Faapotopotoina o Isaraelu | 3 Nifae 20-23 | Vitio o le Tusi a Mamona

Ua tala’i e Iesu le faapotopotoina o Isaraelu. Ua ia ta’u i tagata Amerika Anamua o i latou o fanau a perofeta ma le feagaiga ma e faatuina le Ierusalema fou i lo latou laueleele.

1 Ma sa oo ina ia poloai atu o ia i le motu o tagata ma ona soo foi ia tuu le latou tatalo. Ma sa ia poloai atu ia te i latou ia latou le tuu le tatalo i o latou loto.

2 Ma sa ia poloaiina i latou ia latou tutulai ma tutu i luga i o latou vae. Ma sa latou tutulai ma tutu i luga i o latou vae.

3 Ma sa oo ina toe tofitofi e ia le areto ma faamanuia i ai, ma avatu i le au soo e aai ai.

4 Ma ina ua uma ona latou aai, sa ia poloaiina i latou ia latou tofitofi le areto, ma avatu i le motu o tagata.

5 Ma ina ua uma ona latou avatu i le motu o tagata sa ia avatu foi ia te i latou le uaina e feinu ai, ma poloaiina i latou e tatau ona latou avatu i le motu o tagata.

6 O lenei, sa leai se areto, po o se uaina, na aumai e le au soo, po o le motu o tagata;

7 Ae sa ia avatu moni lava ia te i latou le areto e aai ai, ma le uaina foi e feinu ai.

8 Ma sa ia fetalai atu ia te i latou: O ia o le e ai i lenei areto ua ai o ia i lou tino mo lona agaga; o ia o le e inu i lenei uaina ua inu o ia i lou toto mo lona agaga; ma o le a le fia ai lava pe fia inu lona agaga, ae o le a faatumuina.

9 O lenei, ina ua uma ona aai ma feinu le motu uma o tagata, faauta, sa tumu i latou i le Agaga; ma sa latou alalaga faatasi i le leo e tasi, ma avatu le viiga ia Iesu, o le na latou vaai ma faalogo i ai.

10 Ma sa oo ina ua uma ona avatu e i latou uma o le viiga ia Iesu, na ia fetalai mai ia te i latou: Faauta o lenei ua uma ona ou faia o le poloaiga lea na poloaiina ai au e le Tamā e faatatau i lenei nuu, o e o se toe vaega o le aiga o Isaraelu.

11 Tou te manatua na ou tautala atu ia te outou, ma fai atu, pe a faataunuuina upu a Isaia—faauta ua tusia i latou, ua i ai i latou i o outou luma, o lea ia outou suesue i ai—

12 Ma e moni, e moni, ou te fai atu ia te outou, pe a faataunuuina i latou o le taimi lena o le faataunuuina o le feagaiga lea na faia e le Tamā i lona nuu, o le aiga o Isaraelu.

13 Ma o le taimi lena o le a faapotopoto mai ai toe vaega, ia o le a faataapeapeina solo i luga o le lalolagi, mai sasae ma mai sisifo, ma mai saute ma matu; ma o le a aumai i latou i le malamalama o le Alii lo latou Atua, o le ua togiolaina i latou.

14 Ma ua poloaiina au e le Tamā ia ou tuu atu ia te outou lenei laueleele, mo lo outou tofi.

15 Ma ou te fai atu ia te outou, afai e le salamo Nuuese pe a mavae le faamanuiaga lea o le a latou maua, pe a mavae ona latou faataapeapeina o ou tagata—

16 Ona o atu lea o outou, o e o se toe vaega o le aiga o Iakopo, i totonu ia te i latou; ma o le a outou i ai i le totonugalemu o i latou o e o le a toatele; ma o le a outou i ai i totonu ia te i latou e pei o se leona i totonu o manu o le vao, ma e pei o se leona taanoa i totonu o lafu o mamoe, o le, afai e ui atu ai o ia o le a ia soli i lalo i latou ma saeia lilii, ma e leai se e mafai ona laveaiina.

17 O le a sii i luga lou lima i luga o ou fili, ma o le a vavae ese ou fili uma.

18 Ma o le a ou faapotopoto faatasi ou tagata e pei ona faapotopoto faatasi e se tagata ana fusi saito i le fola.

19 Ona o le a ou faia ou tagata o e na osifeagaiga ai le Tamā, ioe, o le a ou faia ou seu ma uamea, ma o le a ou faia ou atigivae ma apamemea. Ma o le a e tuimomomoina tagata e toatele; ma o le a ou faapaiaina a latou vete mo le Alii, ma a latou mea mo le Atua o le lalolagi atoa. Faauta foi, o au lava o le e faia ia mea.

20 Ma o le a oo mai, ua fetalai mai ai le Tamā, o le a tautau ifo i luga o i latou le pelu o lou faamasinotonu i lena aso; ma e vagana ai ua latou salamo o le a le pau ifo i luga o i latou, ua fetalai mai ai le Tamā, ioe, i luga lava o atunuu uma o Nuuese.

21 Ma o le a oo mai o le a ou faatumauina ou tagata, o le aiga o Isaraelu.

22 Faauta foi, o le a ou faatumauina lenei nuu i lenei laueleele, e faataunuu ai le feagaiga na ou faia ma lo outou tamā o Iakopo; ma o le a avea ma se Ierusalema Fou. Ma o le a i ai i totonu o lenei nuu mana o le lagi; ioe, o le a ou i ai ia te outou.

23 Faauta, o aʼu o le na fetalai i ai Mose, ua faapea mai: O le a faatu mai e le Alii le Atua se perofeta ia te outou mai outou uso, e pei o aʼu; ia outou faalogo ia te ia i soo se mea na te fai atu ai ia te outou. Ma o le a oo mai foi ina vavae ese mai totonu o le nuu soo se tasi o le a le faalogo i lena perofeta.

24 E moni ou te fai atu ia te outou, ioe, ma o perofeta uma mai ia Samuelu ma i latou o e na mulimuli mai, le toatele o e na fetalai, na molimau uma ia te au.

25 Faauta foi, o outou o fanau a perofeta; ma o outou o lo le aiga o Isaraelu; ma o outou o lo le feagaiga lea na faia e le Tama ma o outou tamā, na fetalai atu ai ia Aperaamo: Ma o lau fanau o le a manuia ai aiga uma o le lalolagi.