Xalqqa yolg’on axborot tarqatmang!

Hozirgi kunda ijtimoiy tarmoq orqali yolg'on axborot tarqatish holatlari uchramoqda. Yolg’on axborotni jamoatchilikka tarqatib, o’zini haqiqiy qahramon deb sanaydiganlar ham oz emas. Misol uchun, kuni kecha Telegram kanallarning birida “Damas avtomobilining eshigi uzilib tushdi” deb nomlangan video tarqaldi. Bu esa jamoatchilik orasida turli xil tushunmovchiliklarga sabab bo’ldi.

Uzauto Motors bunday videoga befarq bo’lmadi. Yuz bergan voqea hodisani batafsil o’rganish uchun Komplayens xizmati tomonidan tekshirish ishlari olib borildi.

O’rganishlar natijasida ma’lum bo’ldiki, Damas avtomobili yo’lovchisini manzilida qoldirgandan so’ng, avtomobil eshigini yopmasdan turib harakatlanishni boshlagan. Ehtiyotkorsizligi sabab yo’l chetida turgan “Nexia” avtomobilining bamperiga urilib, YTHsini sodir etgan.

So'nggi vaqtlarda bunday yolg'on xabarlarning tarqalishini tez-tez kuzatmoqdamiz. Shundan kelib chiqib, yurtdoshlarimizdan asossiz xabar tarqatmasliklarini hamda mijozlarimizdan internet tarmog’ida tarqatilayotgan har qanday tekshirilmagan axborotlarga ishonib qolmasliklarini so'rab qolamiz!

Shuningdek, tuhmat, bila turib yolg‘on hamda uydirmalarni tarqatganlik uchun Ma’muriy javobgarlik to‘g‘risidagi Kodeksning 40-moddasida ko‘zda tutilgan bazaviy hisoblash miqdorining 20 baravaridan 60 baravarigacha miqdorda jarima solishga sabab bo‘lishi hamda shunday harakatlar uchun ma’muriy jazo qo‘llanilishini eslatib o‘tmoqchimiz.

Kompaniya har qanday holatda xaridorlari va mijozlari bilan konstruktiv muloqotga hamda har qanday muammoni hal etishga tayyorligini, biroq bu kabi holatlar uchun qonuniy chora ko‘rishga majbur bo‘lishini ma’lum qiladi.