Poroşenkonun səfərlərinin nəticələri

Azərbaycan Ukrayna prezidenti Petro Poroşenkonun səfərinə çox böyük əhəmiyyət verir və görüşlər zamanı imzalanan sənədlər səfərin uğurlu keçməsini təsdiqləyir. Prezident İlham Əliyev Petro Poroşenkonun lk rəsmi səfərinin yekunlarını belə dəyərlənirir. Dövlət başçısı müzakirə edilən bütün məsələlərlə bağlı tapşırıqlar verildiyini deyib. Bildirib ki, iqtisadi və enerji sahələrdə əməkdaşlığın böyük potensialı var:

“Biz danışdıq ki, Azərbaycan idxal edilən malların ölkəmizə gətirilməsi işində Ukrayna şirkətlərinə diqqət yetirəcək, - eyni zamanda, Azərbaycanın artıq çox geniş ixrac imkanları vardır və Ukrayna bazarı – böyük bazar bizim üçün çox maraqlıdır. Konkret tapşırıqlar verilmişdir. Birgə investisiya layihələrinin icrası nəzərdə tutulur və müvafiq göstərişlər verildi ki, hər iki ölkənin investisiya imkanları araşdırılsın. Çünki buna çox böyük maraq var. Energetika sahəsində qeyd edildi ki, Azərbaycan Dövlət Neft Şirkəti – SOCAR artıq Ukraynada fəal iştirak edir, böyük həcmdə - 200 milyon dollardan çox sərmayə qoyub, 60 yanacaqdoldurma məntəqəsi var. SOCAR-ın Ukraynada fəaliyyəti çox uğurludur və ölkələrimizi daha da birləşdirir. Eyni zamanda, vaxtilə çox ciddi şəkildə müzakirə olunan Odessa-Brodı layihəsinin canlanması işində müvafiq göstərişlər verildi. Azərbaycan dünya bazarlarına, o cümlədən Avropaya böyük həcmdə öz neftini ixrac edir. Eyni zamanda, Xəzərin şərq sahillərində yerləşən ölkələr üçün tranzit rolunu da oynayır. Azərbaycan ərazisindən dünya bazarlarına neft ixrac olunur və hesab edirəm ki, Odessa-Brodı layihəsinin canlanması üçün imkanlar var”.

Ukrayna prezidenti Petro Poroşenko da iki ölkə arasında əməkdaşlığı yüksək qiymətləndirir və bu əlaqələrin daha daha genişləndirilməsini vacib sayır:

“Düşünürəm ki, ən perspektivli layihələrdən biri – Azərbaycana An-178 tipli təyyarələrin satışı olacaq. Burada - Azərbaycanda onların birgə istehsalının yaradılması da çox maraqlı bir layihədir. Düşünürəm ki, bu da yeni bazarların kəşfi üçün maraqlı bir layihə olacaqdır. Biz yanacaq və energetika sahəsində əməkdaşlığımızı müzakirə etdik. Burada söhbət Azərbaycanın ehtiyatlarının və Ukraynanın tranzit ehtiyatlarının tətbiq edilməsindən gedir”.

Ukrayna Azərbaycan Parlamentlərarası İşçi Qrupunun rəhbəri, Ali Radanın deputatı Maksim Kuryaçiy isə bu səfəri iki ölkə arasında olan münasibətlərdə yeni əsrin başğanğıcı adlandırır. Onun fikrincə, bu səfərin həm Ukrayna, həm də Azərbaycan üçün böyük əhəmiyyəti var:

“Bu səfərin əsas mahiyyəti ondan ibarət idi ki, burada xırda məsələlər müzakirə olunmayıb. Yalnız real işlər barədə söhbət gedib. Artıq hər şeydən danışıb, heç bir nəticəyə gəlinməyən dövr ötüb keçib. Söhbət zamanı Ukrayna bazarına Azərbaycanın kənd təsərrüfatı mallarının ixracı müzakirə olunub. Özü də birbaşa, vasitəçilərsiz. Çünki bu günə qədər bu iş digər ölkələrdən olan vasitəçilərlə həyata keçirdi. Amma artıq onlara ehtiyac qalmayacaq. Fikrimcə, bu da çox vacib məsələdir. Deyə bilərəm ki, Ukrayna prezidenti imzalanan sənədlərin icrasını ən tez zamanda həyata keçirməyi tapşırıb.”

Görüşdə nəqliyyat dəhlizlərinin fəaliyyəti də müzakirə olunub. Ukraynadan gələn bəzi yüklər Azərbaycan ərazisindən Orta Asiya ölkələrinə nəql edilib. Bu ilk sınağın nəticələrini müsbət qiymətlənsirn tərəflər qərara gəlib ki, bu dəhlizi iqtisadi cəhətdən daha da cəlbedici etmək üçün tariflərə yenidən baxılsın. Çünki tariflər yükgöndərənlər üçün məqbul olmalıdır ki, daha da böyük həcmdə yüklər hər iki istiqamətə getsin”. BUndan başqa Ukraynaa təklif edilib ki, yaxın zamanlarda istifadəyə veriləcək Bakı-Tbilisi-Qars dəmir yolu Ukrayna şirkətləri üçün də yeni imkanlar açır və Kiyev bu yoldan da istifadə edə bilər.