Mehmet Kemiksiz | Kerem Eyle Ya Mevla | Eviç İlâhî

Kerem Eyle Ya Mevla
Eviç İlâhî

Güfte: Azîz Mahmûd Hüdâyî
Beste: Ahmed Şahin

Kulların oda yakma,
Kerem eyle yâ Mevlâ.
Eksiklerine bakma,
Kerem eyle yâ Mevlâ.

Birer eksikli kuldur,
İhsânın ile doldur.
Senin rahmetin boldur,
Kerem eyle yâ Mevlâ.

Tutalım kul le'îmdir,
Efendisi Kerîm'dir.
Adın Rahmân Rahîm'dir,
Kerem eyle yâ Mevlâ.

Yoluna tevfîk eyle,
Fazlını refîk eyle.
Rahmete garîk eyle,
Kerem eyle yâ Mevlâ.

Hâlimize a'lemsin,
Afv edersin ekremsin.
Anamızdan erhamsin,
Kerem eyle yâ Mevlâ.

Çün ki insân eyledin,
Ehl-i îmân eyledin.
Bunca ihsân eyledin,
Kerem eyle yâ Mevlâ.

İhsânını tetmîm et,
Yollarını ta'lîm et.
Gufrânını ta'mîm et,
Kerem eyle yâ Mevlâ.

Derdli âşıklar içün,
Yolda sâdıklar içün.
Bağrı yanıklar içün,
Kerem eyle yâ Mevlâ.

Kutb-ı evliyâ içün,
Sadr-ı asfiyâ içün.
Fahr-i Enbiyâ içün,
Kerem eyle yâ Mevlâ.

Dâ'im sebâtın içün,
Bunca sıfâtın içün.
Şol güzel zâtın içün,
Kerem eyle yâ Mevlâ.

Hüdâyî'ye ihsân et,
Rahmet ile gufrân et.
Her işini âsân et,
Kerem eyle yâ Mevlâ.