İctimai iaşə müəssisələrində dezinfeksiya edilməsi vacib olan sahələr

Ölkə ərazisində ictimai iaşə obyektləri, eləcə də restoran, kafe və çay evləri və bu kimi digər məkanlarda müştərilərə saat 06:00-dan 00:00-dək yerində xidmətlər bərpa olunub. Əhalinin sağlamlığının qorunması və təhlükəsizliyinin təmin edilməsi məqsədilə ictimai iaşə müəssisələrində xidmətlərin təşkili Nazirlər Kabinetinin müvafiq qərarı və normativ hüquqi sənədlərin tələblərinə uyğun həyata keçirilməlidir. Bununla yanaşı, ictimai iaşə müəssisələrində təmizlik-dezinfeksiya işlərinin mütəmadi olaraq həyata keçirilməsi COVID-19 virusuna yoluxmanın qarşısını alan əsas tədbirlərdəndir. İctimai iaşə müəssisələrində koronavirus (COVID-19) infeksiyasının yayılmasının qarşısının alınması ilə bağlı həyata keçirilən maarifləndirici tədbirlərə dəstək məqsədilə hazırlanmış növbəti videoçarxda məhz dezinfeksiya edilməsi vacib olan sahə və səthlər, eləcə də tövsiyə olunan dezinfeksiyaedicilər barədə zəruri qaydalarla tanış ola bilərsiniz. Videoçarxda vurğulanır ki, ictimai iaşə müəssisələrində təmizlik və dezinfeksiya işlərinin dövriliyinə, tətbiqinə icazə verilən dezinfeksiyaedici maddələrdən düzgün istifadə qaydalarına əməl edilməlidir. Təmizlik və dezinfeksiya tədbirlərinin dövriliyi infeksiya riski, insanların sıxlığı, çirklilik səviyyəsi, məhsulun növü, səthin tipi və digər amillər mütləq nəzərə alınmaqla planlaşdırılmalıdır. Qeyd edilir ki, təmizlik-dezinfeksiya işləri iş saatı ərzində əsasən işlək sahələrdə (giriş-çıxış, kassa və s.), iş saatından sonra isə bütün sahələrdə həyata keçirilməlidir. Videoçarxda tövsiyə olunur ki, təmizlik-dezinfeksiya işləri səthlərin xüsusiyyətinə uyğun olaraq aparılmalıdır. İctimai iaşə müəssisəsinin ərazisi, qida qəbulu yerləri (zallar, otaqlar və s.), anbarlar qapı və qapı tutacaqları, pəncərə və pəncərə altlıqları, döşəmə və divar səthləri, sanitar qovşaqlar, tullantıların yığıldığı sahələr və tullantı qabları, həmçinin masa və stulların səthi, mətbəxin ərazisi və avadanlıqlar mütləq dezinfeksiya edilməlidir. Dezinfeksiya işləri həyata keçirilərkən səthlərdə və məkanda istifadəsinə icazə verilən dezinfeksiyaedici maddələrin təlimatına uyğun olaraq tətbiqinə riayət edilməlidir. Belə ki, dezinfeksiyaedici maddələrin istifadə təlimatında qeyd edilmiş yararlılıq müddəti və istifadə qaydası mütləq nəzərə alınmalıdır. Dezinfeksiyaedici maddələr lazım olan konsentrasiyadan (qatılıq) artıq istifadə edilməməlidir. Dezinfeksiya işlərinin aparıldığı mühit mütləq havalandırılmalıdır.

İctimai iaşə müəssisələrində COVID-19 virusuna qarşı mübarizə ilə bağlı hazırlanmış videoçarxda qida ilə təmas edən səthlərin, avadanlıqların təmizliyinin daim nəzarətdə saxlanılmasının zəruriliyi vurğulanır. Qeyd olunur ki, qablar, aparatlar, cihazlar, alət və avadanlıqlar istifadə edilməzdən əvvəl və sonra müvafiq təmizlik qaydaları və tələbləri çərçivəsində təmizlənməli və dezinfeksiya edilməlidir. Avadanlıq özünün və quraşdırıldığı sahənin asanlıqla təmizlənməsinə imkan verəcək şəkildə yerləşdirilməlidir. Qida ilə təmas edən səthlərdə istifadəsi zamanı dezinfeksiyaedicilərin insan sağlamlığına mənfi təsirinin qarşısını almaq və təhlükəsizliyi təmin etmək məqsədilə təlimata uyğun olaraq tətbiqinə diqqət edilməlidir. Videoçarxda vurğulanır ki, qida ilə təmasda olan səthlərin dezinfeksiyasından sonra su ilə durulanması mütləqdir.

Daha ətraflı:
Agentlik sosial şəbəkələrdə: