MİLLİ MƏCLİSİN SƏHİYYƏ KOMİTƏSİNİN İCLASI KEÇİRİLİB

Tibb sahəsi əlavə dəyər vergisindən azad edilməlidir. Bunu Milli Məclisin Səhiyyə Komitəsinin bu gün keçirilən iclasında deputat, Azərbaycan Milli Onkologiya Mərkəzinin baş direktorunun müavini Kəmaləddin Qafarov deyib. Bildirib ki, bu məsələ icbari tibbi sığortanın tətbiqində əhəmiyyətlidir. Deputat dərman vasitələrinin qeydiyyatının sadələşdirilməsini də təklif edib.
Deputat Musa Quliyev də bildirib ki, onkoloji xidmətlə bağlı məsələyə yenidən baxılmalıdır, maliyyə vəsaiti artırılmalıdır. Qeyd edib ki, bu xəstəliklərin müalicəsi üçün dərman vasitələri çox bahadır, bu da əlavə vəsait tələb edir.
İclasda qan azlığı dəmir defisitli anemiyaların hamilə qadınlarda xüsusilə artması məsələsinə də toxunulub. Unun zənginləşdirilməsi ilə bağlı dinləmələrin yaz sessiyasında keçirilməsi təklif olunub. Millət vəkili Qənirə Paşayeva tibb sahəsində maarifləndirmə ilə bağlı müzakirələrin keçirilməsini təklif edib. Bildirib ki, payız sessiyasında reproduktiv sağlamlıq haqqında qanunun müzakirəyə çıxarılması labüddür. Bununla yanaşı bəzi qanunların icbari tibbi sığorta tətbiqinə qədər qəbulunun əhəmiyyətindən danışıb.
İcbari tibbi sığortaya ayrılan büdcə vəsaiti ilə bağlı məsələ də müzakirə edilib. Bu məsələnin 2020-ci ilin büdcə müzakirələrində qaldırılmasının zəruriliyi qeyd olunub.