Ua Viia e Alema Lona Atalii o Sepulona| Alema 38

Ua talanoa Alema le Itiiti i lona atalii o Sepulona, o le sa faamaoni e oo lava ina fetogia o ia i maa ma sauaina e tagata. Ua fautuaina Sepulona e Alema e faalagolago i le Atua ma folafola atu o le a fesoasoani pea le Atua ia te ia i taimi faigata. Ua molimau atu Alema e faaolaina tagata uma e ala ia Iesu Keriso.

E faatatau i le Alema 38:2, 4–5, 9–12, 15.

Alema 38
2 Ma o lenei, lou atalii e, ou te faalagolago o le a ou maua le olioli tele ia te oe, ona o lou maumaututu ma lou faamaoni i le Atua; aua e pei ona e amata mai i lou talavou ona e vaai atu i le Alii lou Atua, ua faapea lava ona ou faamoemoe o le a aveaveai pea ona e tausia o ana poloaiga; aua e amuia lava o ia o le e tumau e oo i le iuga.

4 Ona ua ou iloa sa e i ai i noanoaga; ioe, ma ua ou iloa foi sa fetogi oe i maa ona o le afioga; ma sa e talitalia nei mea uma ma le onosai ona sa faatasi le Alii ma oe; ma o lenei ua e iloa o le Alii na laveaiina oe.

5 Ma o lenei, loʼu atalii e, Sepulona, ou te manao ia e manatua, afai e te tuu atu lou faalagolago i le Atua seia faapea ona tele, o le a ia laveaiina oe i fafo mai ou tofotofoga, ma ou faalavelave, ma ou puapuaga, ma o le a sii oe i luga i le aso gataaga.

9 Ma o lenei, loʼu atalii e, ua ou tau atu ia te oe lenei mea ina ia mafai ona e aoao le poto, ina ia mafai ona e iloa mai ia te au, ua leai se isi lava ala po o ni auala e mafai ona faaolaina ai o le tagata, ua nao ia, ma ala mai ia Keriso. Faauta, o ia o le ola ma le malamalama o le lalolagi. Faauta, o ia o le afioga o le upumoni ma le amiotonu.

10 Ma o lenei, ona ua amata ona e aoao atu o le afioga ua faapea lava ona ou manao ia e aoao atu pea; ma ou te manao ia e filiga ma faautauta i mea uma.

11 Vaai ia aua neʼi faafefeteina oe i luga i le faamaualuga; ioe, vaai ia aua neʼi e mitamitavale i lou lava poto, po o lou malosi tele.

12 Faaaoga le lotoa, ae le o le faafiamalosi; ma vaai foi ia pulea ou tuinanau uma, ina ia mafai ona faatumuina oe i le alofa; vaai ia e aloese mai le faapaie.

15 Ma ia alofa le Alii ia faamanuia mai i lou agaga, ma talia oe i le aso gataaga i lona malo, e nofo i lalo i le filemu. O lenei alu ia, loʼu atalii e, ma aoao atu le afioga i lenei nuu. Ia e faamamalu. Lou atalii e, tofa.