КЕШІРІМДІ БОЛУ- КЕҢШІЛІК!

КЕШІРІМДІ БОЛУ- КЕҢШІЛІК!

Кешірімділік - адам бойындағы жақсы қасиет, пенде біткенге құрметпен, ізгілік тұрғыдан қарау. Кісінің оқыс істері мен зиянды іс-әрекеттері анықталғанда, оған залалды істерінің мән-жайын түсіндіру, кеңшілік көрсету - кешірімділік болып табылады. Кешірім сұрауда әрбір адамның өзі жіберген қатесін ой-санасымен сезініп мойындауы оның мінезіндегі ерлігі мен батылдығын көрсетеді. Кешірімді болу - қоғамдағы азаматтардың болашағына сенім артып, оның саналы түрде тәлім-тәрбие алуына қамқорлық көрсетудің көрінісі. Ислам діні қоғамдағы тыныштық пен ынтымақты сақтау үшін мейірім және кешірімді болуды бұйырады.
Бауырмашылдық, кешірім ең жақсы істерден болып табылады. Ислам діні осындай ұлы жетістіктерге кешіріммен жетті.
Кешірім - отбасының салауатты өмір сүруіне жетелейді.
Кешірім - адамдардың бір-бірінің арасындағы сүйіспеншілік пен махаббатты нығайтады.
Кешірім - адамдар арасында араздық болса, сол араздықты жеңіп, бір-бірімен достастырады.
Кешірім бір-бірінен алыстап кеткен адамдардың арасын жақындатады. Бір-біріне күмәнмен қарағандардың күмәнін жояды.
Кешірім бірін-бірі жек көретіндердің амалын босқа шығарып достастырады. Бұл жайлы Құранда Алла Тағала былай дейді:
«Жақсылық пен жамандық тең емес. Жамандықты ең көркем түрде жолға сал. Сол уақытта сенімен екеуің араңда дұшпандық болған біреу, өте жақын достай болып кетеді».
(Фуссилат сүресі, 34-аят).

Кешірім-кешірім жасаушының дәрежесін көтеріп, барар орнын ұлық етеді. Кешірімді адам біреуге зиян етуді жек көреді. Ол біреуге көмек беруге дайын болады. Кімде-кім кешірімділік сипатына ие болса, ол адам дүниеде бақытты, ал ақиретте жомарттықпен нығметтеледі. Сондықтан да бұл сипат Ислам дінінде көркем мінезділіктің шыңы болып табылады. Кімде-кім кешірімді болса, ол адам өзіне жамандық ойлағандарды кешіріп жібереді. Мұны Алла Тағала өзге аяттарда былай деп түсіндіреді: «Кітап иелерінің көбі оларға шындық айқын болғаннан кейін өз күншілдіктерінен сендерді иманнан кейін күпірлікке қайтаруды қалайды. Алла бір әмірін келтіргенге дейін оларды кешіріңдер, елемеңдер. Күдіксіз Алланың әр нәрсеге күші толық жетеді».(Бақара сүресі,109-аят).

Демек, бұл іс аятпен шектеліп қалмайды керісінше Алла Тағала Алла Елшісіне (оған Алланың салауаты мен сәлемі болсын) мейірімділікпен сипатталудың қаншалықты маңызды екенін айтып келесі аятта былай деп әмір етеді.
«Көк пен жерді әрі екеуінің арасындағы нәрселерді бір шындық бойынша жараттық. Сөзсіз, қиямет келеді. Сондықтан көркем, жұмсақ сыңай байқат».
(Хижр сүресі,85-аят)

Бұл жайлы қазақтың біртуар тұлғасы Шәкәрім Құдайбердіұлы былай дейді:
Біреудің мінін кешірсең,
Құдай да сені кешеді.
Бірін де қылмай есірсең,
Төбеңді әлі-ақ теседі.

Көңілі жұмсақ адамның,
Күрмеуін тағдыр шешеді.
Пейілі жаман адамның,
Орыны дайын деседі.

Бір күні Алла Елшісіне (оған Алланың салауаты мен сәлемі болсын) Жәбірейіл періште келіп: "Ей, Мұхаммед! Мен саған бұл дүниелік және ақиреттік болатын көркем мінездер әкелдім",- деп, мына аятты оқыды:
«Кешірім жолын ұста және оларға туралықты әмір ет. Сондай-ақ, надандардан бет бұр» (Ағраф сүресі,199-аят). Сонда Алла Елшісі (оған Алланың салауаты мен сәлемі болсын) одан бұл аяттың мағынасын сұрағанда Жәбірейіл: "Расында, Алла Тағала саған сенімен арасын үзген адаммен қарым-қатынасын жақсартуды, саған бермеген адамға беруді, саған зұлымдық жасаған адамды кешіруді, саған дұшпандық қылғанға сабыр етуді бұйырды", - деген екен.