ULUA’I SELESELEGA MO ‘ĀIGA I LE TAI - Aso To'ana'i, 22 Aperila 2023.

Na molimauina e le mamalu o le Mālō, fua o fa’a’ele’eleaga, o lafumanu, i’a ma figota fa’asao mai le gataifale fa’apea ai ma meataulima a le pāia o afio’aga ta’itasi o lo’o i totonu o le Itumālō Palota o ‘Āiga i le Tai.

O se itu lelei lea, e iloa ai le mauāluga o le fa’aaloalo a lea Itumālō i le va’aiga mamao a le Mālō ina ia mau taumafa pea Samoa, e aunoa ma le fa’alagolago i meaai mai fafo, o lo’o tele ina sao mai ai le mau ma’i ‘ese’ese ona o meaai lē paleni.

O lea fa’amoemoe, na momoli ai le agaga fa’afetai o le Mālō e tauala atu i le afioga i le Minisitā o le Matāgaluega o Fa’ato’aga ma Faigāfaiva iā La’auli Leuatea Polāta’ivao Fosi ona o le soifua galulue o nai o tatou tagata.