O'zbek dunyosi: Ўзингдан бошқа дўстим йўқ мени, Аллоҳ

“Ўзбек дунёси” дастурининг бугунги сони географияси: Афғонистон, Канада. “Ўзбек дунёси”нинг бугунги сони қаҳрамонлари: Афғонистондаги “Ойна” ўзбек телевидениеси, шоир Холдор Вулқон.

Афғонистонда 3 миллион атрофида ўзбек бор. “Ойна” ТВси Афғонистонда пайдо бўлган биринчи хусусий телеканалдир. У ўз кўрсатувларини ўзбек тилида олиб боради.

Ўзбекча “Ойна”

Мана, 4 йилдирки, “Ойна” ўзбек тилида кўрсатувлар бериб боради. Доимо ўз уйида “Ойна” телеканалини кўрадиган афғонистонлик ўзбек аëлларидан бири ўз тилида телевизор томоша қилишдан хурсанд эканини билдирди. У “Ойна” телеканали Ўзбекистонда ишланган ўзбек фильмларини намойиш этишидан мамнун.

“Бизга ўзбек драмалари, ўзбек фильмлари ëқади. Бошқа каналлардан кўра, биз “Ойна” каналини кўпроқ ëқтирамиз. Болаларим ҳам шу ўзбеклар дубляж қилган фильмларни кўпроқ кўришни истайди”,- дейди аёл.

“Ойна” дарҳақиқат Афғонистон ўзбеклари орасида кўп кўриладиган ягона телеканал ҳисобланади. Ушбу каналда кўнгилочар кўрсатувлардан ташқари айрим сиëсий, маданий, ижтимоий мавзулар устида давра суҳбатлари, баҳс-мунозаралар томошабинларга тақдим этилиб, Афғонистон ва дунëда юз берган турли воқеалар ҳам ëритилади.