Ürəyimdə biri var... Sərbəst şeir...

Müəllif: Əsgər Babayev...

Ürəyimdə biri var...
Tez-tez mənə xatırladır özümü,
İstəmədən gözəlliyi cəlb eləyir gözümü,
Vicdanımın qarşısında ağ eləyir üzümü,
Sevməyimlə fəxr edirəm beləsini,
Mənlə deyil, məndən amma əsirgəmir nəfəsini,
İtib batan xəyalımı hərdən onun qollarında tapıram,
Düşünərək gözlərini sovruluram göylərə,
Asta-asta gül üzünə hopuram.

Ürəyimdə biri var...
Səssiz gedişi ilə həsrətində batıram,
Zəng edəcək bilirəm, gecə-gündüz telefonda yatıram,
Şəkillərlə hələki baş qatıram,
Düşünürəm, gələcək,
Axı onun üçün indi xoş döyünür tək ürək,
Gözlərim qapıdadır,
Hər an qapını açıb gələcəyin umuram.
Gəlişini hiss edərək gülüb hərdən gözlərimi yumuram.

Ürəyimdə biri var...
Səsi incə və şirin,
İncəliyində ondan zəifdir hər şeirim,
Hamı arzu eləyərək deyir, kaş, sevəydim belə birin.
Gözlərinin bəyazı, ay üzünün cilvəsidir,
Gözlərinin qarasısa, ucalığın kölgəsidir,
Hilal qaşı səcdə edən həyatıma bənzəyir,
Kipriyi ox kimi batır gözlərimin içinə,
Sanki yara olan yerə yod dəyir.

Ürəyimdə biri var...
Baxışında yaralı bir qızcığazı gizlədir,
Hər bir kiçik hadisəni dərd edir,
Qayğı ətri olmayan hər cümləm onu incidir,
Qəm qoxuyan yuxuların bəzən olur qonağı,
Təmizləyir ruhu bayram qabağı,
Sevincimi gizli tutur susqun olan dodağı,
Tək ağzından çıxan sözə sevinirəm, gülürəm,
O da məni sevir, onu görməsəm də bilirəm.

Ürəyimdə biri var...
Ayağının səsini sindirib ürəyimə,
Yazıb alın yazımızı ruhu ilə hər iki göz bəbəyimə,
Ürəyim də ona görə güc gələrək biləyimə,
Darıxaraq hər tərəfi dağıdır,
Qırır sevgi quşlarının hamısının qanadın,
Addım-addım qəlbi gəzir, bitirmir öz inadın,
Nədənsə heç dayanmır da bu qadın,
İndi gedir, getdiyi yer özü çəkən ayrılığın dağıdır.

#qəzəl #qəzəllər #poetry #love #keşfet #sad #şeirlər #poem #greenscreen