Hans Well & Wellbappn Wirecard Krippenspiel

Wos duat denn da Ox im Krippal drin, des muaß d`Finanzaufsicht Bafin sei
De Staatsanwaltschaft München 1 steht ois Esl aa dabei
De glotzn treu und brav und stumm, saudumm im Stoi herum
Ernest und Young Hirten redn aa net vui, beim Wirecard Krippenspui

Da Jan Marsalek hot a frommes Gschau/ der muaß doch ehrlich sei
Sonst foiatn de Merkl und/ da Scholz net auf eahm rei
Nach China und in d` ganze Welt, hom´s de Frohbotschaft verkindt
Aa da Söder und KT von Guttenberg, betn an das Wunderkind

D`Maria und da Josef Huaba, warn beim Aktienkauf dabei
Wenn sogor d`Regierung jubiliert / werd scho ois` richtig sei
Die Heiligen Drei Könige, knien vor dem Kind im Stall
Mafiabosse, Geldwäscher / Anlagebetrüger von überall

In jener Zeit im Morgenland, einsam auf der Flucht
Fand a Herberg der Jan Marsalek, von Interpol gesucht
In seine Luxushotelsuitn, legt s` Christkind am Marsalek
Zur Bescherung untern Weihnachtsbaam/ an 1,9 Mrd. Scheck

De Weihnacht werd für Mari und Josef und/ d` KfW Bank ziemlich staad
Da Söder sogt daß er des Wirecard Kind/ gor net kenna daat
Hoch drom am Weihnachtshimmi, verglühen Sternentaler
ein Komet mit am Schweif hell wia de Sunn/das Geld vom Steuerzahler

Vorbei is´ bei de Gläubiger, mit der Heiligenverehrung
Wettn in keiner Weihnachtansprach, hört ma was von der Bescherung!