П Бадарч Бороо шүлэг

П.Бадарч Бороо

Саа мөнгөн утасны үй түмэн нийтгэлээр
Сансар газар хоёрыг нэхэж байна уу гэмээр
Сайхан тунгалаг хур хөллөнхөн шаагиж
Сая живаа морьтны давхиа шиг газар дэлхийг бөмбөрдөж байна.
Уулсын тэнэгэр нуруунд ургаж ганхсан модны нь
Уруул шиг зөөлөн навч нахиаг нэвтлэн
Уран ганган тэр үе тогтон мэлтгэнэх нь
Уйлж мэлмэрсэн нүд мэт харагдуулна.
Толгой сэгсрэн инээвхийлэх зуны түмэн цэцгийн
Торго адил зөөлөн дөрвөн дэлбээн дээр
Тоонот монгол гэрийн хошуулдсан өрхний
Тодхон цагаан төвшин дээр,
Атар дураараан өвсний соргогт бэлчих
Адуун олон сүргийн шашир самбаа дэл дээр
Айлын гадаа угсарсан чингэлэгт олон тэрэгний
Алс замд элсэн дугуйн дээр,
Яаруу яваа эрэлчийн хантайрч сойсон хүлгийн
Ясан хяртай эмээлийн зөрүүлж шуусан гөлмөн дээр
Яралзах долгио нь улайран бууралтаж мэлтийх
Яруухан урсгалт хэрлэн мөрний хээн дээр,
Аянчин гийчний утаат цэнхэр майхны
Алга дарам нарийнхан нуруун дээр
Арван дэлэм урт хусан уургын
Атгаж барих уран шулуун ишэн дээр,
Зэлэн дундаа ногтруу шувуу шиг жигдхэн
Зээрэн хөлт зуун унаганы зоон дээр
Зэгс нуурандаа ятгын уяхан дуутай
Зэрэгцэнхэн ганганах хос ангирын далин дээр,
Үүл өлгөсөн өндөр сарьдаг уулсын
Үлгэр домгийн юм шиг хадан хясаанд
Үүр өргөөгөөн зассан зоригт хүрэн бүргэдийн
Үр өндгөөн тэвэрсэн буурал жигүүр дээр,
Сая сая живаа морьтны давхиа мэт нижигнэж
Сайхан тунгалаг хур хөллөнхөн шаагиж байна.
Эрдэм номын замд хүү намайгаан үдэж
Эцэг буурлын минь үлдэж хоцорсон хөтөл дээр,
Энхрий хайрт эгчийн минь дүүгээн байнга харуулддаг
Эгцхэн нүдэн уулын ургаа ургаа чулуун дээр,
Очиж миний ижий тандаан золгох
Олны хөлд элэгдсэн хуучин шаргал зам дээр
Орчлон эх дэлхийд миний анхалж гишгэсэн
Онгон талын шороо төрсөн буурины минь дээр,
Унаа сүлдэн талаар гэрэл цахилгаан улаачилж
Уужим тэнүүнд нь алсарсан цуурай мянган шон дээр
Унаган наснаас хайртай хөдөө чамайгаан зурж ядсан
Урт хэрлэнгийн хүүгийн уярч санасан сэтгэл дээр,
Сая живаа сая живаа мөнгөн дусал шившиж
Сайхан тунгалаг хур шаагинхан бууж байна
Саа мөнгөн утасны үй түмэн нийтгэлээр
Сансар газар хоёрыг нэхэж байх шиг санагдана.