ШАХАБОВ СС йоца байташ...

Показать описание

...Тхо-м дац кху дуьнено хьийзадеш доххал.
Тоделча ирх лелхац, делхац цатарна.
Хьалхарниг дахарна хьажийна оха,
ШолгIаниг - дIадахьа эхарта кхана.

***
Цецвийла, кхарда а хIума-м дац, амма
Тамашийна-м хуьлу цхьаволчун амал:
Хьол толахь тIехь Iийр ву эла а хилла,
Хьо толахь гехь Iиэн а тоьур ду хIилла.

***
Халонехь хьовсу вай лаьттачу хьоле,
Эццахь бо тидам а, хастам а гIоле.
Некъ шера болчохь-ма хоьцций дIавоьду,
Цундела гIоргIа некъ шерачул тоьлу.

***
Семачу ойланийн говзалла елла,
Хьуо дашна кечвинчу ницкъболчу Дала
Хьайн йоза кхетамца тIеэцар делла
Кечдина кхин адам хир дац ма ала.

***
...Цхьаъ довзахь, йоцучохь керла неI йоьллу,
Ткъа девзаш хилла бIе дазло хьо зиэ.
Керлачу хIумано бIаьргаш ца боьллу,
Ширачех хервала дог къовлуш биэ.

***
Цхьамма цхьа дикачух цIе цхьанна тиллахь,
Йа кхечо кхин моьттина вочех и вахь,
Хьо-м - кийча хезначух тардина гIаларт
-Каш даккха йа йотта дахарна гIала.
-Къонахчун тIегIане ваьккхина айван
Йа кIиллойн могIаре виллина вайван.
Ма-дарра гуш долчух кхетазчу хьуна
Хезначо тешам лахь, къахета суна.
...Генарчу серлоне муха хьо уьду,
ХIун йу а ца хууш седа йа къуьда?

***
ХIун биен ду? Йан ма йац цхьа а башхалла:
Айвина лелорах йа текхарх халла.
Цхьатерра хьийзор йу-кх дуьнено ане
Тахана вайн доцуш - вай доцуш кхана.

***
...Мах а лой эца со, эцалахь хьайга.
Дешийца тилавай, дайде сан дош.
Нагахь сан керайукъ цIийелла къагахь,
Йуьсийла кехате къолам ца хьош.

***

...Хаставай эца со, эцалахь хьайга.
ЦIерашца айавай, йохайе чот.
Нагахь со кураллин седанах къагахь,
Байташна бехка сан йозанан мотт.

***

...Шун кечдай эца со, эцалахь хьайга.
Чемашца Iехавай, сацайе бат.
Нагахь со вохкалахь доьшанан Iайгах,
Йемалдиэ йорт тоьхна дахаран хатI.

ШАХАБОВ СС