Ateshli Sheirler - LUT HEQIQET

#ateshlisheirler #lutheqiqet

LÜT HƏQİQƏT
(XIX Əsr Rəvayəti Əsasında)
Yalan Həqiqətlə rastlaşır bir gün:
-Nədən sən yorğunsan, çox halsız, qəmgin?
Nə gözəl havadır, gəl gəzək birgə,
Dərdləşək, özünə gələrsən bəlkə.
Həqiqət ətrafa salanda nəzər,
Ətrafı bəyənir, gəzməyə dəyər.
Cüt gəzib, dərdləşib, çox dolaşırlar,
Sulu bir quyuya gəlib çatırlar.
Yalan öz əlini salaraq suya:
-Gəl birlikdə çimək, gedək yuxuya.
Su necə ilıqdır, olar faydası,
Çıxar canımızdan bütün ağrısı.
O da ilıq suya əlini salır,
Çimmək təklifindən çox razı qalır.
Birlikdə üzürlər bu ilıq suda,
Özlərin sanırlar şirin yuxuda.
Yalan bircə anda tez çıxır sudan:
-Artıq son fürsətdir, tez qaçım burdan.
Sanki gözləyirdi belə bir anı,
Geyir Həqiqətin paltarlarını:
-Əzab-əziyyətim nəhayət bitdi!
Bunları söyləyib, o gözdən itdi.
Əsəbli Həqiqət çıxır qırağa,
Başlayır Yalanı soraqlamağa.
İstəyir paltarın alıb geyinsin,
Nifrətin Yalanın üzünə desin.
Dünya da görəndə lüt Həqiqəti,
Artır ona qarşı kin-küdurəti.
Həqiqət utanıb dönür quyuya,
Quyuda əbədi gedir yuxuya.
Həqiqət paltarın geyərək Yalan,
Dolaşır Dünyanı həmən zamandan.
Yalanın böyükdür hörmət qiyməti,
Kor Dünya görməyir lüt Həqiqəti.

25.10.2016. Atəş İbrahimov