QGİS proqramında məlumat bazasının qurulması və sadə redaktə əməlləri #GismanisDesigningourfuture

“Coğrafi İnformasiya Sistemlərinin (CİS) tətbiqi ilə coğrafiya fənnini tədris edəcək müəllimlərə təlim” layihəsi çərçivəsində 7-ci təlim həyata keçirilib
24.12.2021 tarixində Azərbaycan Respublikası Təhsil Nazirliyinin Təhsildə inkişaf və innovasiyalar üzrə 5-ci qrant müsabiqəsinin qalibi olmuş Astara şəhər C. Babayev adına 3 saylı tam orta məktəbin müəllimi Nəvai Qənbərovun rəhbəri olduğu “Coğrafi İnformasiya Sistemlərinin (CİS) tətbiqi ilə coğrafiya fənnini tədris edəcək müəllimlərə təlim” layihəsi çərçivəsində 7-ci təlim həyata keçirilib. “Google Meet” platforması üzərindən onlayn formatda həyata keçirilən təlimdə layihənin rəhbəri N.Qənbərov, layihənin eksperti S.Salayev və layihəyə seçilmiş coğrafiya müəllimləri iştirak edib.



Peşəkar CİS təlimçisi Samir Vəlizadə tərəfindən “QGİS proqramında məlumat bazasının qurulmasının davamı və altlıq xəritənin əlavə edilməsi, yaradılmış laylar üzərində sadə redaktə əməlləri” mövzusunda həyata keçirilən təlim praktik şəkildə təqdim olunub. Təlimdə ilk öncə əvvəlki dərsdə QGİS proqramı ilə bağlı öyrədilən biliklər sual-cavab olunub. Sonra iştirakçıların hazırladıqları ev işlərinə qısaca nəzər yetirilib. Təlim zamanı layların yaradılması, hər hansı xəritə şəkilinin koordinata gətirilməsi göstərilərək izah olunub. Bu proseslər zamanı çətinlik çəkən iştirakçılardan rica olunub ki, öz kompüterlərinin ekranını “Google meet” proqramı vasitəsi ilə bütün təlim iştirakçıları üçün yayımlasınlar. Sonra təlimçi onlara prosedur qaydaları təqdim edərək iştirakçılar öz kompüterlərində eyni prosesi təkrarlamaqla yaranmış çətinlikləri aşa biliblər. Bu və ya digər formada iştirakçıların mövzu ilə bağlı bütün sualları praktik yollarla cavablandırılmışdır. İştirakçılara yeni tapşırıqlar verilmişdir. Təlimçi qeyd edib ki, növbəti dərslərdə artıq ilk xəritələrin yaradılması işinə start veriləcəkdir. Hansı ki, həmin xəritələr “Coğrafi İnformasiya Sistemlərinin (CİS) tətbiqi ilə coğrafiya fənnini tədris edəcək müəllimlərə təlim” layihəsi çərçivəsində sonda hazırlanan elektron tədris vəsaitində yayımlanacaqdır. Bu məlumat iştirakçıların təlimə marağını daha da yüksəldib.



Növbəti təlim “QGİS proqramında məlumat bazasında edit proseslərinin icrası” mövzusunda həyata keçiriləcək.