#Утумнааһын: Олунньу 24 күнэ - Кут оҥоһуута

Олунньу – Одун Хаан ыйа. Бу ыйга киһи бэйэтин Айыы туругун оҥостор. Ол аата кутун көрүнэр. Кут диэн олохпут тыына чуумпутук үүнэрэ ааттанар. Киһи олоҕо чуумпутук үүнэрэ кут буолар. Айдааннаах олоххо кут тохтообот. Ол аата тыын кыайан үүммэт. Ону этэллэр кут куоппут диэн.
Олунньу 24-гэр Туруу маска кут оҥоһуута олорор. Туруу маска олох тыына чуумпутук олохсуйар кэмэ. Кут оҥоһуллар бириэмэтэ. Ити кэмҥэ сибэ уот умайар.

-1-
Дьээ-буо!
Алака-чалака!
Туруктаах олох
Оҥоһуутун айыыта
Одун Хаан тойон,
Үрүҥ тыына
Үрүҥ былыт буола
Бэттэх буол.
Үрүҥ сылгы
Үүт маҥан кылынан
Күндүлээн эрэбин.
Муундара, муундара, муундара.

-2-
Дьээ!
Алам-чалам!
Ийэ тыл иччитэ
Ытык Чыыбыстай хотун,
Ичээн тылын иччитэ
Чычып-Чыыбыстаан ,
Этэр тыл иччитэ
Сырыбынай уол,
Үрүҥ былыты
Үрүҥ күлүк гына
Бэттэх буол.
Мичик аллай,
Истэ сэргэҕэлээ,
Арыылаах саламаатынан
Айах тутан эрэбин.
Ытык тылбын ыл,
Сүҥкэ тылбын көтөх.
Дуом айхал.

-3-
Көхсүттэн көнтөстөөх
Күн өркөн ууһа,
Арҕаһыттан тэһииннээх
Айыы хаан аймаҕа
Арыаллаһар аналлаах
Айыы санааны арыйан,
Ааттаан-тускулаан
Маннык диэн
Аманыйан эрэбит.

-4-
Үс былас
Ураа лаҥкыр муостаах
Дьыл оҕуһа тойон
Ойо тура эккирээт,
Томороон тымныы
Ороһу булгунньах саҕа
Хатан хабараан тыынын
Уҥа диэки
Киэр силэйээт,
Кураан этиҥинии
Тиҥиниччи мөҥүрүү-мөҥүрүү
Чыҥысханнаах илин диэки
Аа дьуо аалан
Айаннаан барда.
Одун хаан оҥоруутунан
Туруктаах олох кута
Төлкө буолар оҥоһууланан
Туруу мас
Көмүс ньээккэ уйатыгар
Олордо.
Айыллан үөскээбит
Хоту дойдум иччитэ
Хаар маҥан баттахтаах,
Хотугу хотун эбэм
Үрүҥ сырдыгынан көр.
Ийэ сирим бараххан
Көмүс аалыы курдук
Күлүмүрдээ,
Айыы сирэ
Алтан аалыы курдук
Арылый.
Ол туһунан
Сэһэргиир сэһэммин,
Кэрэһилиир кэтит кэскилбин
Истэр иччим,
Көрөр айыым
Тыллаах чыычаах гына
Айыы суолун устун
Өрө дылбат.
Туруктаах олох кута уруйданнын,
Силиктээх олох кута айхалланнын.
Дом.