Obama: Musulmon amerikaliklar - vatanparvarlar

Amerika rahbari Barak Obama ilk bor mamlakatdagi masjidlardan biriga bordi, Merilend shtati Baltimor shahridagi islomiy dargohga. Jamoa bilan tushlik qildi.

Markazdan turib so'zlagan nutqida prezident masjidlarga umrida bormagan yurtdoshlarini Amerika musulmonlari hayoti va ibodatxonalari bilan yaqindan tanishishga undadi.

Millionlab musulmon amerikaliklar davlat taraqqiyoti uchun azaldan salmoqli hissa qo'shib keladi, dedi prezident. Ular fidoyi, vatanparvar fuqarolar, dedi Obama.

Amerika islom yoki musulmonlarga qarshi urushda emas, dushman - terrorizm va uning e'tiqodga aloqasi yo'q, deya qayd etdi, davlat rahbari.

Prezidentlik uchun kechayotgan saylov kampaniyasida ayrim nomzodlar musulmonlarni qattiq tekshirish kerak, ularning mamlakatga kirib-chiqishini cheklash kerak deya chaqirayotgani Obama nazarida kaltabinlik. Davlat o'z fuqarolariga ishonishi, ularning haq-huquqlarini poymol etmasligi lozim, deydi u.

AQSh bag'rikeng mamlakat va millionlab musulmonlarga vatan, bu o'zgarmaydi, deydi prezident.