Ыалдьыт: Анастасия Пахомова (Кузьмина)

Хатыҥ" кэпсээн ааптара.
Танялаах Кэскил куоракка үөрэнэллэр.Сайын ийэлэрин дойдутугар салгын сии, сир астыы тахсар буоллулар. Эбээлэрэ үөрүү бөҕөтө. Сиэннэрин сарсыарда аайы күөрчэҕинэн аһатар. Ыаллара быччыкы бэристэхтэринэ, ону ыһаарылаан сииллэр. Эбээлэрин батыһа сылдьан, ньирэйдэрин, көтөрдөрүн аһаталлар. Ол сылдьан дьиэ кэннигэр саҥа быган эрэ мас умнаһын көрдүлэр. “Эбээ, бу туох талаҕый?” — Таня ыйыта оҕуста.
— Күһүн хатыҥ олордубутум. Хата, быкпыт. Уу кутан биэрэ сылдьар киһи, син үүнүө эбит, — эбэтэ хоруйдаата.
Сонно тута Таня быраатынан, көлүччэлэриттэн кыра солуурунан уу баһан таһааран куттулар. Ити курдук нэдиэлэҕэ үстүү-түөртүү солуур ууну кута сырыттылар. Кэскил кэнникинэн үлэ оҥостон, үөрүүнэн ккирэн, уутун баһа охсон таһаарар.
Сайын барахсан биллибэккэ ааһа оҕуста. Танялаах Кэскил куораттарыгар төнүннүлэр. Нөҥүө сайын эбээлэригэр кыайан кэлбэтилэр эрээри сонуну истэ, хатыҥнарын сураһа сырыттылар.
Эһиилигэр эбээлэригэр барар буоллулар. Эрдэттэн кэһии хомунуу буолла. Эбэлэрин тэлгэһэтин ааныгар массыынаттан түһээт, Кэскил чочоччу уһаабыт хахыйаҕы көрө биэрдэ. Мап-маҥан хахыйах күөх сэбирдэхтэринэн симэммит. Эҕэрдэлиирдии сэбирдэхтэрэ тэлибиирииллэр.
— Эбээ, саҥа хатыҥы олордубуккун дуу, оттон биһиэнэ ханнаный?
— Тоойуом, уу куппут хатыҥҥын билбэтиҥ дуо? Эһиги хатыҥҥыт үүнэн итиччэ буолла.
— Уо-ай, наһаа үчүгэй буолбут! — Таня, кэһиилээх суумкаларын ааҥҥа халлараат, хатыҥҥа сүүрдэ.
Хатыҥчааннарын курдук биллэрдик улааппыт Танялаах Кэскил ити сайын туһа бөҕө буолбуттара. Оттоһон, отонноон куораттарыгар өссө улаатан төннүбүттэрэ. Билигин Танялаах Кэскил эбээлэрин тэлгэһэтигэр мас бөҕө силигилии үүнэн эрэр.
Настя Кузьмина “Королева цветов” диэн 2001 сыллаахха “Бичик” кинигэ кыһатыгар бэчээттэммит кинигэтиттэн.