İran hökumətinin Urmiya gölü barədə yalanı ifşa olundu

Bu ilin fevral ayının sonlarında İran prezidenti İbrahim Rəisinin Qərbi Azərbaycan əyalətinə səfəri çərçivəsində illərdən bəri qurumaqda olan Urmiya gölünə su ötürülməsi layihəsinin açılışı oldu. Bildirildiyinə görə, bu, həmin layihənin Piranşəhr yaxınlığındakı Kanisib bəndindən Urmiya gölünə tunel və kanal vasitəsilə ildə 300 milyon kubmetr su verilməsini nəzərdə tutan birinci mərhələsidir, bu ilin sonu-gələn ilin əvvəllərində başa çatması planlaşdırılan ikinci mərhələdən sonra isə gölə ötürüləcək suyun həcmi 600 milyon kubmetrə çatacaq.
Ötən müddətdə hökumət mediası bu layihəni geniş təbliğ edərək onu az qala Urmiya gölünün nicatı kimi qələmə verib. Məsələn, “Təsnim” informasiya agentliyi “Urmiya gölünün xoş günləri” başlıqlı yazısında gölün xilas olunmasına yerli əhalinin sevindiyini vurğulayıb. Lakin elə o vaxt ciddi mütəxəssislər İran hökumətinin atdığı addımların Urmiya gölünün xilası üçün yetərli olmadığını bildirirdilər. Aydın olur ki, İbrahim Rəisi hökumətinin tədbirləri daha çox təbliğati səciyyə daşıyır və gölün qurumasının qarşısını almamaqla bağlı ona yönəlik tənqidlərin kəsilməsi niyyəti güdür. Belə ki, bu günlərdə, daha dəqiq desək, iyulun 16-da nüfuzlu “Etimad” qəzetinin Urmiya gölünün durumu barədə dərc etdiyi hesabat hökumətin yalanını ifşa etməklə bərabər, gölün həmişəlik qurumağa doğru getdiyini göstərir.

#İran #Rəisi #Urmiya #göl #quruma