Ferdinando Russo: 'O LUCIANO D' 'O RRE - Le videopoesie di Gianni Caputo

Le più belle poesie napoletane - Ferdinando Russo: 'O LUCIANO D' 'O RRE - Le videopoesie di Gianni Caputo
– Addò se vere cchiù, Santa Lucia?!
Addò sentite cchiù l'addore 'e mare?
Nce hanno luvato 'o mmeglio, 'e chesta via!
N'hanno cacciato anfino 'e marenare!
E pure, te facea tant'allegria,
cu chelli bbancarelle 'e ll'ustricare!
'O munno vota sempe e vota 'ntutto!
Se scarta 'o bello, e se ncuraggia 'o brutto!
Ah, comme tutto cagna! A tiempo 'e tata,
ccà se tuccava 'o mare cu nu rito!
Mò ncopp''o mare passa n'ata strata,
tutto va caro, e niente è sapurito!
Santa Lucia m'ha prutiggiuto sempe!
M'ha rata 'a vista 'e ll'uocchie, pe veré
ca l'ommo cagna comme cagna 'o tiempe,
e ca chi sa che vène, appriesso a me!
Io, quacche vota, quanno sto nfuscato
e me straporto a quann'ero guaglione,
me crero ca so' muorto e sutterrato
sott''a muntagna 'e chisto Sciatamone!
Pare n'ato paese! È n'ata cosa!
Tu nce cammine e nun te truove cchiù...
E pure, è certo, era accussì spassosa,
Santa Lucia d''a primma giuventù!
Arbanno juorno, dint''e vuzze, a mmare,
c'addore 'e scoglie e d'ostreche zucose!
Verive 'e bbancarelle 'e ll'ustricare
cu tutt''o bbene 'e Ddio, càrreche e nfose!
E chelli ttarantelle int''a staggione!
Femmene assai cchiù belle 'e chelle 'e mo'!
Uocchie 'e velluto, vocche 'e passione,
lazziette d'oro e perne, int''e cummò!
Tutt''e ccanzone t''e ppurtava 'o mare,
p''a festa r''a Maronna r''a Catena,
cu 'a bbona pesca, 'e cuoppe r''e renare,
e 'a cantina 'e Cient'anne sempe chiena!
Mò... che ne cacce? Cca s'è fravecato!
Tutto è prucresso, pe puté arrunzà!
Si' marenaro? E, quanno 'e faticato,
fai ll'uocchie chine... e 'a rezza nun t''o ddà!
Quanta ricorde! Quanta cose belle!
N'arena d'oro e n'abbundanza 'e ciele!
Treglie e merluzze, vive, int''e spaselle,
e 'o mare tutto cummigliato 'e vele!
Veneva 'a voce, da li pparanzelle:
“Aonna, 'o mare! Aonna!...„ E li ccannele
s'appicciavano nnanza a li Ssant'Anne,
p''a pruvverenzia “ch'è venuta aguanne!„
Te redevano ll'uocchie comm''o sole!
Tenive mmocca 'o ddoce d'ogne mmèle!
Nfra l'anno 'mmaretàvemo 'e ffigliole
cu uno 'e tutto, 'e musulline e tele!
N'appicceco? Era justo 'e tre pparole!
Muglièreta? Nu scuoglio! Era fedele!
Ncapace 'e niente, a chillo tiempe bello,
c'ogne cazetta era nu carusiello!

'E state, tuorno tuorno all'ustricare,
muntagne 'e freselline e tarallucce.
L'addore 'e purpetielle e fasulare
faceva addeventà pisce 'e cannucce!
E nterra 'a rena sciascïava 'o mare;
e, appriesso, 'o ballo d''e ttarantellucce;
e nu suono e chitarra e tammuriello,
e na magnata d'ostreche 'o Castiello.