Ua Faatino e Nifae le Faatuatua e Maua ai Meaai | 1 Nifae 16:23–32

Показать описание

Ua faaali e Nifae lona faatuatua e ala i le gaosiaina o se aufana ma se ‘aū fou. I le faaauupegaina i lana ‘aū fou ma se maatā ma ni maa, ua saili atu ai Nifae i le taitaiga mai lona tama-perofeta, o Liae, e faatatau i le mea e tuli manu ai. Ua salamo Liae ma saili atu i le taitaiga a le Alii. O se taunuuga, ua ia mafai ona ta’u atu ia Nifae le mea e alu i ai mo ni meaai, ma ua faamanuiaina le fasigā manu aivao a Nifae e fafaga ai ona aiga.

1 Nifae 16:23–32:
23 Ma sa oo ina faia e aʼu o Nifae mai se laau se aufana, ma mai i se laau saʼo, se ufanafana; o le mea lea, sa ou faaauupegaina ai aʼu lava i se aufana ma se ufanafana, faatasi ma se maata ma ni maa. Ma sa ou fai atu i loʼu tamā: O fea ou te alu i ai e maua mai ai ni meaai?
24 Ma sa oo ina ole atu o ia i le Alii, ona ua latou faamaualalaloina i latou lava ona o aʼu upu; ona e tele mea sa ou fai atu ai ia te i latou i le malosi o loʼu agaga.
25 Ma sa oo ina tulei mai le siufofoga o le Alii i loʼu tamā; ma sa aoaiina moni lava o ia ona o lona muimui e faasaga i le Alii, sa oo ina ave ifo o ia i lalo i le loloto o le faanoanoa.
26 Ma sa oo ina fetalai mai le siufofoga o le Alii ia te ia: Inā vaai ia i le polo, ma vaai i mea ua tusia ai.
27 Ma sa oo ina ua vaai atu loʼu tamā i mea na tusia i le polo, sa fefe o ia ma gatete tele lava, ma sa faapea foi oʼu uso ma atalii o Isamaeli ma a matou ava.
28 Ma sa oo ina vaai atu aʼu o Nifae, sa ʼou vaai i vae sa i totonu o le polo, ua ola i laua e tusa ma le faatuatua ma le filiga ma le gauaʼi sa matou tuu atu i ai.
29 Ma sa tusia foi i o laua luga se tusitusiga fou, lea na manino i le faitau, lea na tuu mai ai ia te i matou le malamalamaaga e uiga i ala o le Alii; ma sa tusia ma suia ia tusitusiga mai lea taimi i lea taimi, e tusa ma le faatuatua ma le filiga sa matou tuu atu i ai. Ma ua faapea ona tatou vaai ai e mafai e le Alii ona faataunuu mea tetele i ala faatauvaa.
30 Ma sa oo ina alu atu aʼu, o Nifae, i luga i le tumutumu o le mauga, e tusa ma faatonuga sa tuuina mai i le polo.
31 Ma sa oo ina ou fasi manu ʼaivao, sa oo ina ou maua ai meaai mo o matou aiga.
32 Ma sa oo ina ou foi mai i o matou faleie, ma faafuata mai manu na ou fasia; ma o lenei ina ua latou vaai mai ua ou maua ni meaai, sa latou olioli lava! Ma sa oo ina latou faamaualalalo i latou lava i luma o le Alii, ma avatu le faafetai ia te ia.