Milli Məclis cəzaları sərtləşdirdi

Milli Məclisin iclası Ali Məhkəmənin hakimlərinin və Şirvan Apelyasiya Məhkəməsi hakiminin təyinatının təsdiqlənməsi ilə başladı.
Parlamentin hüquq siyasəti və dövlət quruculuğu komitəsinin sədri Əli Hüseynli bildirdi ki, Ali Məhkəmənin hakimlərinin bu təyinatları ömürlük xarakter daşıyır. Sonra deputatlar Azərbaycanla Türkiyə arasında bir sıra sahələrə dair razılaşmaları təsdiqlədilər. Sənədlərdən biri iki arasında sürücülük vəsiqələrinin qarşılıqlı tanınması və dəyişdirilməsini nəzərdə tutur. Məsələni şərh edən millət vəkilləri Azərbaycanın Türkiyə vətəndaşları üçün viza rejiminin ləğvini təklif etdilər.

SİYAVUŞ NOVRUZOV – MİLLƏT VƏKİLİ: "Azərbaycanla Türkiyə arasında, xüsusilə də Naxçıvan üçün viz rejimi ya birdəfəlik ləğv olunmalı, ya da müddəti uzadılmalıdır. Türkiyədə işləyənlər, oradan bizə iş qurmağa gələn biznesmenlə çətinlik çəkirlər, hər 3 aydan bir sərhədi keçirlər. Belə çıxır ki, işləyib qazandıqları elə yolu puluna gedir".

“Miqrasiya Məcəlləsi”nə dəyişikliklərin müzakirəsi zamanı millət vəkili Əflatun Amaşov diqqəti Gürcüstan vətəndaşı olan azərbaycanlıların rastlaşdıqları çətinliklər yönəltdi. Bildirdi ki, onlar hansısa səbəbdən 10 gün müddətində qeydiyyata düşə bilməyəndə külli miqdarda cərimə olunurlar.

ƏFLATUN AMAŞOV – MİLLƏT VƏKİLİ: "Nəticədə onlar cərimə ilə üzləşir və ya ölkəyə gəlməsinə məhdudiyyət aparılır. Təklif edirəm ki, sərhəddə Miqrasiya Xidmətinin strukturu fəaliyyət göstərsin. Gürcüstandan təkcə azərbaycanlılar deyil, başqa millətlər də keçir. Sərhəddə qeydiyyata düşmək üçün bu dəyişiklikdən əlverişli istifadə edilə bilər”.

Deputatların ən çox münasibət bildirdikləri mövzu isə vergilərlə əlaqədar oldu. Vergilər Məcəlləsinə dəyişikliklərlə bağlı layihənin müzakirəsi zamanı müxtəlif sahələrdə Əlavə dəyər vergisinin ləğvi təklif olundu. Daha çox dəmir yolunda ƏDV-nin tətbiqi və çap məhsullarına vergilərin yüksək olması gündəmə gətirildi.

CAVİD QURBANOV – MİLLƏT VƏKİLİ: "Biz dəmiryolunun inkişafı üçün xaricdən elə avadanlıqlar alırıq ki, onlar nə Azərbaycanda istehsal olunur, nə də təmir olunur. Amma biz bundan ötrü çox böyük miqdarda ƏDV ödəyirik. Biz bilmirik ki, kredit alıb avadanlığı ölkəyə gətirək və ya hansısa formada böyük həcmli ƏDV ödəyək. Biletin qiymətini qaldırmaq istəmirik".

HİKMƏT MƏMMƏDOV – MİLLƏT VƏKİLİ: Devalvasiyadan sonra çap mediasının vəziyyəti
bir qədər də çətinləşib. Ona görə də çap məhsulları üçün gətirilən kağızın ƏDV-dən azad olunmasını istərdik".

Vergi Məcəlləsinə edilən döyişikliyə əsasən, bəzi məhsulların idxalı və satışı əlavə dəyər vergisindən azad edildi. Milli Məclisin iclasında həmçinin, “Gömrük tarifi”, “Banklar”, “Sığorta fəaliyyəti haqqında” qanunlara, eləcə də “İnzibati Xətalar” və “Cinayət Məcəlləs”inə bir sıra dəyişikliklər qəbul olundu. “Cinayət məcəlləsi”nə edilən dəyişikliyə görə, qanunsuz sahibkarlıqla məşğul olan şəxslər həbsə düşməyəcək, sadəcə cərimə ödəməklə məsuliyyətdən azad olunacaqlar. Onlar cinayət nəticəsində vurulmuş ziyanı tamamilə ödədikdə və cinayət nəticəsində əldə edilmiş gəliri tamamilə dövlət büdcəsinə köçürdükdə cinayət məsuliyyətindən azad olunacaqlar. Bununla yanaşı, bəzi digər cəzalar sərtləşdirilib. Ümumilikdə, Milli Məclisin iclasında 16 məsələ müzakirəyə çıxarılaraq qəbul olunub.