LEHKHATHAWN HNUHNUNG( Fanuin nu lehkha a thawn chu)

Показать описание

LEHKHATHAWN HNUHNUNG.

Thal ni sa rum rut mai chu hliah khuh vek tum ni awm takin chhim lam ruam atang chuan chhum lei vak a rawn let chho but but a, khawpui ri dum dum leh kawlphe zawr zawrte chuan rawn thuahhnih zuiin, a theih zawng a lantir emaw tih mai turin thli lah chu na em emin a rawn thawk zui bawk a, khawlaia nu thenkhat fate ko tuar tuar ri leh motor pit ri vak vakte chuan thil engemaw tak hmachhawn tur a awm tih hai rual lohin a hriat theih a ni, rei pawh ni lovah chuan ruah thim pui chu rei tawk inchhek khawm tawh ni awm takin a buak in a rawn baw ta hawk hawk a,

Chu ruah leh thli inrawn tluk tluk hnuaiah chuan , a room tukverh rawn insawi ri leh dat dat chu an melh leh zawk a, chu khaw awmdan runthlak lutuk chuan, lungngaihna vawrtawpin a keng ta emaw tih mai turin , trek tla ri leh thruai karah chuan aw rawl chhuah meuhin a tap hawm hawm a, a trap zo thei dawn lo emaw tih hnuah chuan, a han nui leh rih a , a chhan hre lovin hmu ta ila chu mi â emaw kan ti ngei ang.

Chu nula khawngaihthlak tak chu a tap zo ta emaw tih turah chuan, a pen leh lehkhapuan chu la chhuakin dawhkanah chuan a han inchhawp a, tihian a ziak ta a.

Ka nu duhtak,

Nu, i nulat laia letter i dawn thute leh ka pa nena in inthawn nasat thinzia min hrilh thinte kha ka la hre reng mai. Ka nu , i tana lehkhathawn ka ziah hmasak ber tur leh hnuhnung ber ni turin tunah hian ka ziak ve chhin dawn a ni.

Nu, kum 21 chhung i hmangaihna dawngin ka lo hmangral ve ta reng mai. Khang hun zawng zawngah khan ka tana tha lo tur min tihsak ngai lo tih ka hria a ni, ka tan engkim i huam a, mahse i fanu hian i hmangaihna a rulh let dan che hi keipawhin tha lo ka ti asin, mahse ka siamthat theih a ni si lo, fanu laktlak loh tak ka ni.

Nu, i fanu i naute duhawm tak hian i hriat lohin thil tam tak ka tawng a, i hriat ka phal hauh lohte nen lam ka pai hnem asin. Nu, rethei bakberh chung pawha rual ka awh hlaua i thawhrimna te, ei tur tui tha tha i ei chak lai pawha , ka tan i khek hram hram thinte kha ka theihnghilh phal lo. Inchhung khawsak ngaihtuaha i rilru buai zia te, hrehawm ka tih hlaua i nui lui hram hram ka hmuh thinte avangte khan, ka lungngaihna te, ka natna te hi, hria ni la chuan kei aiin i lungngaiin i mangang dawn tih ka hria , mahse he ka damchhung rei lo teah hian, tih lungngaih belhchhah che ka duh tawh bik lo alawm, Nu, hun ka nei rei tawh lo ang, chuvang chuan maw, i hlim lo hmel hmuh ai chuan, i hlim hmel hmuh reng ka duh zawk mai a ni.

Nu, ka inrinhlelhna chu a rei tawh , mahse, a eng zawnga thlir hram hram tura min chah thin ang khan, a tha lam chu ka beisei ve reng thova. Thla hmasa khan biopsy result a chhuak a, thisen cancer ah pawh a thawk chak chi ka lo ni a. Nu, dik tak chuan maw ka rilru a hah lutuk. Mahse , keini ang chhungkua ang ruangah chuan engtinmah inenkawlna kan nei dawn lo tih ka hria a, tih lungngaih belhchhah che ka duh lo , mahse maw, nu, ka hlau a ni,

Nu, thil tam tak ka ngaihtuah a, i fanu i chhuan em em lakah hian beiseina sang tak i nei tih ka hria. Hlawhtling taka eizawnga , i retheihna hi engtikah emaw chuan nuamsa taka ka siam hun tur che beiseinain i thlir fo tih ka hria, NU, keipawhin maw, hmabak thui tak beiseina nen ka thlir a, ka zirnaah hian hlawhtlina, pasal duhawm tak neihte pawh ka chak a, tuna ka ngaihzawng pawh i duh chi tak a ni tih nangman min hrilh kha. Nu, ka hmaah hian tih tur tam tak inchhawpin ka hmu a, mahse, Nu, he natna nen chuan engtin nge ka tih theih tak ang? Engmah ka ti hman tawh lo ang. Nu, nang vang tal pawh hian i kum chen ang dam ka la duh ve sin.

Nu, Pathian pawh ka au a lawm, mahse keia vanduai tam tak ka hmuh hian damna dil ngam pawhin ka inhre lo, huaisen taka thihna ka hmachhawn theih nan ka dil a. Ka vui lo asin. Kan tana tha lo turin rem a ruat ngai lo, tiin nang pawhin min hrilh kha.
Nu , nang chu nu chhel tak i ni a, ka tel lo pawhin i awm thei em em ang tih ka hria a, i kiangah ka u leh naute, ka pa thlengin an awm alawm, he ka natna nen hi chuan in tan tangkaina ka nei dawn si lova. Ka tan chhungkua, in insengso vak ringawt dawn si a. Chuvangin he ka natna hi hre lo law law ula, ka hun neih rei lote chhungah hian hlim takin kan awm ho thei zawk ang.

Nu, lo kal ta pawh ni ila, min hrilh fo thin leh ka tana i tawngtaina rah avangte khan, Isua bulah chuan ka kal ngei dawn a, a hnen thlen chu ka chak tawh khawp mai. Nu , i fanu hi i duat leh i chhuan em em hi kohhranah leh KTP ah pawh ka active tiraw, Mahse nu, Isua bulah chuan enge ka sawi tak ang? Keimah tana tha turin hun ka hmang thin a. Eizawnnaa ka hlawhtlin nan theihtawpin ka bei a, sual langsar reng reng ka ti lo, ruihtheihthilah fihlimin , mipat hmeichhiatnaah fihlim mah ila, mahse , Nu, nasa taka ka ngaihtuah hian, chung ringawt chu a tawk si lo a ni.. Isua hnen thlenpui turin engmah sawi tur ka nei lo hian min ti hrehawm nghal em em zawk a ni. Nu, ka kalna lam tur chu, min ngaihtuah lo ang tih chu ka hria alawm.

Mahse maw, nu ka hlau a ni, thih h