Dengbêj Mihemedê Holî (Xato): Xwedî li dengê min derkevin

Dengbêjan her tim dîrok û wêjeya devkî ya kurd zindî li ser pêya girtine û ji dîrokê heta roja me ya îro vê wêjeya devkî dewam dike. Yek ji van dengbêjan jî Mihmedê Xatî ango Mihemedê Holî bû. Dengbêj Mihemedê Xato 83 sal beriya niha li gundê Holê ya bi ser navçeya Hezoya Êlihê ve hatiye dinyayê. Dengbêjê Mihemedê Xato di 10’ê îlonê de ji ber nexweşînê pê re peyda bibûn koça dawî kir û ji nav hezkiriyên xwe xatir xwest û wan xemgîn kir. Dengê wî wek mîrateyek li pey wî ma. Di temenek ciwan de dest bi kilambêjiyê dike û li gel dengbêjiyê karê cotkariyê dike û di heman demê de hosteyê dîwar lêkirinê bûye. Bi vî awayî debara malabata xwe dikir. Dengbêj bavê 9 zarokan bû û seranserî jiyana xwe bi dengê xwe yê xweş ruh da kilaman û kilam qîr dikir. Li herêma Êlihê yek ji dengbêjê herî bêtir dihat nasîn bû.