Бэкстэйдж культурного десанта 2022 #Чаппанда

Показать описание

Кэскили түстүүр сурахтаах суол.

Ньурба улууһун, Чаппанда нэһилиэгэр култуурнай десант хомуллан тиийэн «Дойдум миэнэ Чаппанда» диэн социокультурнай бырайыагы төрүттээн, туруоруммут сыалын сүрүнүн ситэн, кыттыбыт, үлэлээбит дьон сүргэлэрэ көтөҕүллэн, саҥа сүүрээннэри олоххо киллэрэргэ тирэх ылан, өйдүүн-санаалыын уларыйан, арыллан кэллибит диэтэххэ омун буолбатах. Тыа сирэ барахсан, кини ыалдьытымсах дьоно-сэргэтэ, айар - тутар дьоҕурдаах дьоҥҥо үтүө дьайыыта, ыраас салгына, сибиэһэй аһа – үөлэ киэҥник толкуйдуурга, холку, аһаҕас буоларга биллибэтинэн сирдиир.
Сахабыт сирин араас эйгэ үлэҺиттэрин түмэн «Айар Кут» түмсүү маҥнай тэриллиэҕиттэн ылата киһи хаппытаала сайдыытыгар олук ууран тэрийэр, оҥорор, сырдатар үлэтин өрө туппута.
Биир салаатынан култуурнай десант 5 сыл иһигэр 2027 сылга, Ньурба улууһугар Саха сирин норуоттарын IX оонньууларын көрсө түһүмэхтэринэн үллэриллэн, былааннанан үлэтин саҕалаата. Инникини быһа түһэн этиммэккэ, санаа, түгэн, бириэмэ хайдах салайарынан, көрдөрөрүнэн хас биирдии салаа бэйэтин геройдарынан сирдэнэн, тэтимин ыһыктыбакка сайдарын ситиһиэх эрэ тустаахпыт. Билиҥҥи бириэмэ ирдииринэн “аныгы тэтими” эрэ өрө туппакка, хас биирдии эдэр киһи бэйэтин түөлбэтин, дойдутун, култууратын ытыктыы, убаастыы улаатарыгар болҕомто уурарга уонна сөптөөх үлэни ыытарга дьаныһабыт. Ол курдук киһи буолан айыллан бу сиргэ тирэхтээх буоларын ситиһэргэ өбүгэлэрбит үтүө үгэстэрин сөргүтэн, устуоруйаларын сырдатан, төрөөбүт төрүт тылы ырыанан, тойугунан, хоһоонунан, суругунан атын араас ньымалары холбуу тутан тэрээһиннэри ыытарга сорук турбута.

Егор Иванов, «АЙАР КУТ» түмсүү салайааччыта.