Nizami Gəncəvi - 880 il. BDRNK

Azərbaycan Respublikasının Prezidenti İlham Əliyevin Sərəncamı ilə 2021-ci il klassik Azərbaycan şairi “Nizami Gəncəvi ili” elan edilmişdir. Təsdiq olunmuş tədbirlər planına əsasən Azərbaycan Texniki Universiteti nəzdində Bakı Dövlət Rabitə və Nəqliyyat Kollecində dahi şair və mütəfəkkir Nizami Gəncəvinin 880 illiyinə həsr edilmiş “Nizami Gəncəvi– 880” adlı onlayn tədbir keçirilib. Kollecin tərbiyə işləri üzrə direktor müavini Şahmurad Məmmədov 2021 - ci ilin ölkəmizdə “Nizami ili” kimi qeyd olunduğunu deyib. Bildirib ki, Prezident İlham Əliyevin imzaladığı sərəncamda dünya ədəbiyyatının görkəmli nümayəndəsi, dahi Azərbaycan şairi və mütəfəkkiri Nizami Gəncəvi bəşəriyyətin bədii fikir salnaməsində yeni səhifə açmış nadir şəxsiyyətlərdən biri kimi dəyərləndirilir.
Nizami Gəncəvi Gəncədə yaşayıb, yaradıb. Yaxın və Orta Şərq fəlsəfi - ictimai və bədii - estetik düşüncə tarixini zənginləşdirən ecazkar söz sənəti incilərini də məhz burada ərsəyə gətirib. Onun geniş şöhrət tapmış “Xəmsə”si dünya poetik - fəlsəfi fik¬rinin zirvəsində dayanır. Şahmurad müəllim qeyd edib ki, ölkəmizdə Nizami irsinin tədqiqi və tanıdılması sahəsində xeyli iş görülüb.
Əsərləri yüzilliklərdən bəri sevilə-sevilə oxunub bu gün də ürəkləri fəth edən dahi Azərbaycan şairi və mütəfəkkiri Nizami Gəncəvi bəşər mədəniyyətinin yetirdiyi nadir şəxsiyyətlərdəndir. Söz dünyasının günəşi, hələ saglığında əsərləri möcüzə sayılan Nizami özü də yaradıcılığının dəyərini yaxşı bilmişdir. Dahi sənətkar bədii fikir tarixini insan səadəti, mənəvi yüksəklik, mənalı ömür, azad və ədalətli cəmiyyət və. s. kimi əhəmiyyətini heç vaxt itirməyən ölməz ideyalarla zənginləşdirmişdir. Nizami sənəti özünün humanist ruhu, xalq arzu və istəklərinin aydın, təsirli ifadəsi ilə seçilir. Buna görədir ki, bu zəngin irs bütün dövrlərdə müasir səslənmiş, təqdir olunaraq izlənilmişdir. Şair “Sirlər xəzinəsi” poemasında belə bir fikir yürüdür ki, elmin, mədəniyyətin, ədəbiyyatın inkişafında dəmir bir qanunauyğunluq var. Nizami özündən əvvəlkilərlə müqayisədə şeiri elə bir əlçatmaz yüksəkliyə qaldırmışdır ki, sonradan gələn sənətkarlar artıq ondan yüksəyə qalxmaq xülyasına düşməmiş, onun yolu ilə getməyi, ona bənzəməyi, onun şagirdi olmağı özləri üçün fəxarət saymışlar. Nizami mövzularında əsərlər yazmaq, ondan mənalar iqtibas etmək artıq bir ənənəyə çevrilmişdi.
Tədbirdə Azərbaycan dili və ədəbiyyatı fənn birləşməsinin müəllimləri Damət Əliyev və Natəvan Hüseynova Nizami Gəncəvinin həyat və yaradıcılığı barədə geniş və əhatəli çıxış ediblər. Çıxış edənlər cari ilin “Nizami Gəncəvi ili” elan edilməsini, Azərbaycançılığa, onun tarixinə və mədəniyyətinə olan ehtiramın təzahürü olduğunu qeyd ediblər. Bildirilib ki, milli-mənəvi dəyərlərə hörmət ulu öndər Heydər Əliyevin apardığı siyasətin mühüm tərkib hissələrindən idi. Məhz Ümummilli Lider hakimiyyətdə olduğu dövrdə Azərbaycan mədəniyyətinə, milli-mənəvi dəyərlərə hər zaman xüsusi diqqət yetirilib və bu siyasətin məntiqi davamıdır ki, bu gün ölkə üzrə mütəfəkkir şairimizin irsini təbliğ edən silsilə tədbirlər keçirilir.
Tədbirin sonunda tələbələr Nizaminin kəlamlarından, şeirlərindən və əsərlərindən parcalar səsləndirmişlər.

1. Həsənli Gülzar – ÇT-419 A qrupu
2. Zeynalova Şahanə -RT110 A qrupu
3. Şərbətəli Röya – MŞ-110 qrupu
4. Türkan Əhmədova – M-710 qrupu
5. Vəliyeva Gülşən – RQ-310 A qrupu
6. Mehtizadə Aytac – RT110 A qrupu