MİLLİ MƏCLİS BURAXILDI

Azərbaycanın müstəqillik tarxində ilk dəfə olaraq millət vəkilləri özləri parlamentin buraxılması haqqında təşəbbüs irəli sürdü. Deputatlar parlament çoxluğunu təşkil edən Yeni Azərbaycan Partiyasının təklifini dəstəkləyərək parlamentin buraxılması və yeni parlament seçkilərinin keçirilməsi ilə bağlı prezidentə mraciət edilməsi barədə qərar qəbul etdilər. Məsələyə həsr olunmuş iclasda spiker Oqtay Əsədov gündəlik haqqında qısa məlumat verdi. YAP icra katibinin sədr müavini Siyavuş Novruzov parlamentin buraxılması ilə bağlı təklifin nəyə əsaslandığını açıqladı. Qeyd etdi ki, prezidentin apardığı islahatların daha da sürətləndirilməsi və bütün dövlət hakimiyyəti qollarını əhatə etməsi üçün Milli Məclisin də fəaliyyətinin təkmilləşdirilməsinə, səmərəliliyinin artırılmasına, yenilənməsinə ehtiyac duyulur.
20-ə yaxın deputatın çıxışından sonra vitse-spiker Bahar Muradova Milli Məclisin buraxılması və növbədənkənar seçkilərin təyin edilməsi haqqında Azərbaycan Respublikasının Prezidentinə müraciət edilməsi barədə" qərar layihəsini oxudu. Layihədə bildirilir ki, deputatların əksəriyyəti parlament buraxılmasını təklif etdiyindən Milli Məclisin işini davam etdirməsi mümkün deyil.
Qərar layihəsi səsverməyə çıxarıldı və 99 deputat lehinə olmaqla qəbul edildi. Səsvermədə 1 nəfər birtərəf qalıb, 1 nəfər qərar layihəsinin əleyhinə səs verib. 1 deputat isə səsvermədə iştirak etməyib. İclasın sonunda Spiker Oqtay Əsədov bildirdi ki, Sabah Milli Məclisin iclası V çağırışın tərkibi üçün sonuncu ola bilər. Yarımçıq qalan qanun layihələri sabah keçiriləcək plenar iclasda müzakirə olunacaq.