📖 SRĂ GOH | 1 KÔRINTÔ # 10

-----------------------------------
🔰 1 KÔRINTÔ # 10 🔰
-----------------------------------
❇️ Pleh dê bơta duh khoai rùp ràk
Ơ oh mi, añ ò kòñ oh mi ò git bơh ồng pàng bol he jơh tơl nă neh ơm hơđơm mhwal mơ lòt gan dàlềng, jơh tơl nă bol khai gơs ƀaptem hơđơm mhwal mơ tòm dàlềng nàng jat Môise. Jơh ală bol khai sa bal dô nơm phan sa đah hwềng, mơ hùc bal dô nơm phan hùc đah hwềng, bơh bol khai hùc bơh dô nơm pơnai lŭ đah hwềng lòt jat bol khai, pơnai lŭ hơ̆ la Bơtau Krist. Bulah behơ̆, oă cau tòm bol khai ò niam nùs Yàng Tom Trồ, gen tàng gơplơ̆ chơt tòm ƀlàng bràs. Mơ tai, ală bơta hơ̆ lơh krơh bol he in, nàng bol he in bañ hàm kòñ is ală bơta iơh be bol khai neh hàm kòñ. Kung bañ duh khoai rùp ràk be cau ƀà tòm bol khai neh duh khoai; be neh cih lah:
“Làng bol nggui sa ñô,
gen ntào mơ kơnhơl tòmya, dri tơlàr.”
Bol he kung bañ tìs glài rềs àr bơrnàn be cau bà tòm bol khai neh tìs, mơ tòm dô ngai neh gơplơ̆ chơt bàr jơt pe rbô nă cau. Kung bañ lòng Yàng be cau ƀà tòm bol khai neh lòng mơ gơkòl bơs coh chơt. Kung bañ yoam, be cau ƀà tòm bol khai neh yoam mơ gơkòl chơt roh bơh Cau Gơnrơh Tơnroh.
Mơ tai, ală bơta hơ̆ neh gơtơntus bol khai in nàng lơh krơh, mơ neh cih nàng bơto tơngkah bol he, la cau ơm tòm rài lồi dut. Behơ̆, cau lơi kơlôi he ntào kơ̆, gen kơrhia tĕ rngòt gơplơ̆. Ò gơs bơta gơlòng lơi gơtơntus oh mi in rlau mơ kòn mơnus òs kong; mơya Yàng Tom Trồ la Bơtau lơh jat jơnau ho Kơnràñ dê, Kơnràñ ò lòi oh mi kong gơlòng rlau mơ pràn he dê, mơya tòm bơta gơlòng gen Kơnràñ kung pò gùng tồ geh lik klàs nàng oh mi in rgơi kong jai.
❇️ Cơnòng duh khoai Yàng tòmsò mơ cơnòng duh khoai rùp ràk
Behơ̆, ơ ală cau kòñ gơboh añ jê, pleh tĕ dê bơta duh khoai rùp ràk. Añ đơs kung be đơs mơ ală cau jak chài; oh mi pal sơwì ală jơnau añ đơs. Mơngàn mơ bol he ngui tòm tŭ Sa Kah Yàng mơ bơh hơ̆ bol he neh ưnngài Yàng Tom Trồ: tòm tŭ bol he hùc, bol he gơs pơnah tòm mhàm Bơtau Krist. Mơ piang lă bol he dơrkă, tòm tŭ bol he sa, bol he geh pơnah tòm să jan Bơtau Krist. Bơh gơs mìng dô nơm piang lă, mơ bol he bulah oă cau kung mìng dô nơm să jan; bơh jơh ală bol he gơs pơnah tòm dô nơm piang lă hơ̆. Sền tĕ cau Israel jat poac să: Ală cau sa poac duh khoai behơ̆ ò gơtòmklac bal mơ cơnòng duh khoai sơl ơ? Behơ̆, ñchi jơnau añ đơs taih? Phan duh khoai rùp ràk gơs kwơ sơl? hala rùp ràk gơs kwơ lơi sơl? Pơrlơ̆ wơl, ală phan cau làng bol bơdìh ơn duh khoai la ơn duh khoai ală cà, ò di la ơn duh khoai Yàng Tom Trồ. Behơ̆ añ ò kòñ ală oh mi tòmklac bal mơ ală cà. Ală oh mi ò rgơi hùc mơngàn Yàng dê, mơ kung hùc mơngàn ală cà dê; oh mi ò rgơi sa phan Yàng dê, mơ kung sa phan ală cà dê. Hala bol he kòñ lơh Yàng in ƀoah pơrñat ơ? Bol he pràn rlau mơ Kơnràñ ơ?
❇️ Pal dong ală cau lơbơn lơño
Oh mi đơs lah: “Bol he geh gơnoar lơh jơh ală bơta.” Ngan behơ̆, mơya ò di jơh ală bơta gơs kwơ oh mi in. “Bol he geh gơnoar lơh jơh ală bơta,” mơya ò di jơh ală bơta bơt bơtào oh mi. Bañ gơs cau lơi jòi bơta cồng nha is he in, mơya pal jòi tĕ bơta cồng nha cau ndai in. Poac lơi tac tòm drà, gen sa tĕ; bañ bơh nùs tồr mơ lùp bơta lơi, bơh plai ù mơ ală phan tòm plai ù gơrê bal mơ Yàng. Dilah gơs cau ò dòn jà oh mi mơ oh mi kòñ lòt, dilah khai yò phan lơi oh mi in gen sa tĕ, bañ bơh nùs tồr mơ lùp bơta lơi. Mơya, dilah gơs cau lơi yal oh mi in lah: “Phan do neh ơn pơdơng duh khoai” gen bañ sa, tài bơh cau neh yal he in mơ bơh nùs tồr tai sơl. Añ ò di đơs bơh nùs tồr oh mi dê, mơya bơh nùs tồr cau ne dê. Ñchi bơh tài bơta khat gơboh añ jê pal kong nùs tồr cau ndai cahrña taih? Dilah añ ưnngài Yàng Tom Trồ mơ sa, ñchi bơh tài añ kong cahrña bơh phan añ neh ưnngài hơ̆ taih? Behơ̆ dilah oh mi sa, hala hùc, hala broă lơi oh mi lơh, gen bơh bơta gơklŏ Yàng Tom Trồ dê mơ lơh tĕ jơh ală bơta. Bañ lơh gơtup tìs cau Juda in, hala cau Grek in, hala Hìu Jum Goh Yàng Tom Trồ in. Kung be añ, lơh niam nùs jơh ală cau tòm jơh ală bơta, ò di jòi cồng nha is añ in, mơya jòi cồng nha oă cau in, nàng bol khai geh dong klàs.

#SrăGoh #Kôrintô #JơnauNiamKơho