Бераллера дагалецам... (Джабраилова Руми)

Показать описание

Бераллера дагалецам

Дийцахьа нана йуха-ъ хьайн туьйра,
Гул а бай вайн доьзал цхьаьна йуьргlи кlел:
«Ма майра летара текхаргах куьйра,
Шен кӀорни къевсина, деллашехь гӀел»

Хlусам вайн шелйелла, цӀе латайехьа,
Ваша ву дигарца доккхуш дечиг.
Пеша чохь мижаргаш, хьокхамаш дехьа,
ТӀо-берам, гlалмакх чай, токхе йериг.

Тхан ловзар дохадай кхайкхахьа шуьне,
Кхоьллинчу Аллахlе тхох беркат доьхуш.
Ма хазахетара цу хенахь дуьне,
Да-нана, доьзал а, вай цхьаьна долуш.

«Балхара кӀадвелла шу да чувеъна,» —
Алахьа йуха а: —«ГӀовгӀа ма йелаш !»
— «Болх бина, кӀадвелла, садаlа веъна!»
— ОьгӀазе алахьа: «Таппъале lелаш!»

Лакхахьа йуха а, нана, хьайн эшарш,
Сагатлуш йоьлхуш хьо, хьайца делхаде.
Хьайна тӀе гул а дай, тхо маракъуьйлуш,
Дийцаршца lеха а деш, тхо дийшаде.

Аьчкан пхьар, тхан ден-да, пхьаьлгӀий чохь воллу,
Богучу кӀорйуккъехь эчиг ду дохдеш.
МорзугӀца кхера цо, эчиг схьадоккху,
Нуьйжа тӀехь чӀургашна хӀазарш ду деш...

Ден-ненан даьхни ду, цаьрца йу гомаш,
Божли чохь, цlов билла кечдина хьаьвда.
Бешахь бу масех дуо, цу чохь йу хьаьжкӀаш
Говра йу дlайоьжна, тӀехь тесна ворда.

Мегий со йуха а «диттийн йукъ» — йаха,
Кlайн-медан, бероза комараш йаа?
Сан дагалецамаш соьца а битна,
Безначех хедайеш зама дlайаха.

Дийзи сан шерашка йуха схьайерзан,
Ма чӀогӀа хала ду, дех хьоьгуш йиса.
Ницкъ кхачац нана хьан, деган чов йерзон,
Бералла дӀайаха, lодика йина.

20.05.2021шо

Джабраилова Руми