АЛГЫС КҮНЭ

Сахалар күөх чээлэй хонууга үктэнэн, үрүҥ тунах ыһыахпытыгар Алгыс ылан көрсүбэтэхпит быйыл, иккис сылыгар барда. Ньурба улууһугар, дьаҥ турбутунан сибээстээн, ыһыах онлайн куйаар ситимин нөҥүө, бэс ыйын 21 күнүгэр, күн муҥутаан үөһэ күөрэйэр кэмигэр, Үрдүк Айыыларга сүгүрүйэн, Алгыс күнэ диэн ааттанан ыытылынна. Ыһыах үтүө үгэһинэн, Үруҥ күҥҥэ сүгүрүйүү сиэрэ-туома күнү көрсүү түһүлгэтиттэн саҕаланна. Түһүлгэҕэ түптэ буруотунан сыт таһааран ыраастаныы кэннэ, өбүгэлэртэн кэлбит сиэр-туом быһыытынан дьахтар аймах хаҥас өттүттэн, эр дьон уҥа өттүттэн түһүлгэҕэ киирдилэр. Айыы алгысчыта Иван Герасимович Васильев уот иччитин күндүлээн, маҥан сылгы сиэлинэн аартыктары арыйда, арыылаах алаадьынан, үрүҥ илгэлээх Айыы аһынан айах тутта,алгыс көтөхтө. Сарсыардаттан икки сиринэн, эр дьоннорго, Кыталыктаахха Кымыс иһиитин түһүлгэтигэр куту бөҕөргөтөргө , дьахтар аймахха, Бүлүү Эбэ кытылыгар Айыыһыт Иэйиэхсит Алгыһын иҥэрии сиэрэ-туома ыытылынна. Айыы Алгыһын сиэрин-туомун биллэр алгысчыттар Алгыс Уйбаан уонна Алиса Михайловна Иннокентьева толордулар. Маны сэргэ ыччат дьону күрүөлүүр алгыс мааныта күнүс Кыталыктаах кырдалыгар ыытылынна. Бу алгыс, аналын толору ситэрэн, быйыл сөргүтүллүбүт Айыы Аартыгар оҥоһуллубута, ураты суолталаах буолла. Бу Айыы Аартыга диэн, өбүгэ саҕаттан баар өйдөбүл эбит, Саха сиригэр биир бастакыннан Ньурбаҕа быйыл сөргүтүлүннэ. Бу улахан, сүдү суолталаах оҥоһугу норуот маастара Аммос Давыдов суруллан хаалбытыттан, тугу да уларыппакка, оҥордо. Эһиил кэлэр сылга ыарыы намтаан ыһыах буолар түгэнигэр, бу айыы Аартыгар хас биирдии сэргэ аайы күөх чэчир анньылыахтаах, сэргэлэри ситимнээн ситии быаҕа салама ыйаныахтаах. Быйылгы ыһыах Алгыс күнэ диэн куйаарынан ситимнэнэн ыытылынна. Онон бу күннэ анаммыт Алгыс үтүө тыллара, дьоҥҥо-сэргэҕэ үтүөнү түстүүр, күүс эбэр, санааны көтөҕөр, үс куту бөҕөргөтөр күрүө-хаһаа, харысхал буолуохтара.