Энэ онд 93 хүн хар тамхины хэрэгт холбогджээ

Хар тамхи, мансууруулах бодистой холбоотой гэмт хэрэг жил ирэх тусам нэмэгджээ. Тухайлбал, 2012 онд 36, 2013 онд 37, 2014 онд 65, харин энэ оны зөвхөн эхний таван сард л гэхэд 34 бүртгэгдсэн байна. Хамгийн сүүлд тавдугаар сарын 20-ноос энэ сарын 2-ны хооронд 21 холбогдогчтой 10 гэмт хэргийг ЦЕГ-ын Хар тамхитай тэмцэх хэлтсийн алба хаагчид илрүүлжээ. Гэмт хэрэгт холбогдон сэжиглэгдэж байгаа этгээдүүдийн гурав нь хар тамхи, мансууруулах бодистой холбоотойгоор өмнө нь ял шийтгэл эдэлж байжээ. Сэжигтнүүдийн гэр болон машинд хийсэн үзлэгээс 111 гр мөс, 15.5 гр гашиш, 6.4 кг өвё, 490 ширхэг анданте илэрчээ. Эдгээр шалгагдаж байгаа сэжигтнүүдийн дунд урлаг соёлынхон, төрийн албан хаагч байж болзошгүй хэмээж байгаа. Тэгвэл энэ талаар ЦЕГ-аас “Тухайн хүний нэр хүндийн асуудал, мөн хэрэг нь шалгагдаж байгаа учраас мэдээлэх боломжгүй” гэсэн юм.

Мөн цагдаагийн байгууллагаас анхааруулж буй бас нэг асуудал нь саяхныг хүртэл эмийн сангуудаар худалдаалагдаж байсан анданте гэх эмийг энэ онд Эрүүл мэнд, спортын сайдын тушаалаар эмийн жагсаалтаас хасч, хар тамхи, мансууруулах бодисын жагсаалтад бүртгэсэн явдал юм. Зарим иргэдийн хувьд энэ талын мэдээлэлгүй, нөгөө талаас санаатайгаар андантин гэх энэ эмийг хэрэглэх тохиолдол гарчээ.