Оддод тэмүүлсэн хүсэл - Г. Дашдорж & oddod temuulsen husel - Dashdorj. G

Оддод тэмүүлсэн хүсэл уулсыг өндөр болгосон
Орчлонгийн зулай ч гэсэн үүлсэд атаархаж өндийсөн
Наран саран ч гэсэн зэрэгцэж гэрэлтэхийг хичээсэн
Насан үүрдийн хайр гэж би чамайг хайрласан

Гол бүхэн цутгаж далай болгох гэж мэрийсэн
Голт зүрхний амрагаа өөрийн болгох гэж хичээсэн
Гал бүхэн бадарч тэнгэрт тэмүүлж дүрэлзсэн
Гарын минь арван хуруу чамайг тэврэх гэж тэмүүлсэн

Зүлэг бүхэн сэргэх гэж хур орохыг хүлээсэн
Зүрхний гэгээн чамайг надад ирэхийг хүлээсэн
Он цагийн урсгалд хорвоо эргэж байнам
Онгон зүрхний угт чамайг мөрөөдөж суунам

Хангай нутгийн салхи сэрүүн байлаа ч гэсэн
Хайртай амрагийн сэтгэл халуун байгаа юм чинь
Хором бүхний тухай бодолд автан суусан ч
Хонгор амраг чи минь бодолд уяатай юм даа

Цээлхэн говийн салхи халуун байгаа ч гэсэн
Цээжинд аргамжаатай чи минь хөөрхөн байгаа юм чинь
Цэцэгс бүхэн хагдарлаа ч чи минь наддаа дэлгэрнэ
Цээл уяхан хоолой нь чихнээ байнга сонсогдоно

Аавын мөнгөн аягыг цайтай барьсан гэргий
Ээжийн цагаан сүүг тэнгэрт сүслэсэн бурхан
Эерэг гэгээн хайрандаа жарган жарган сууя
Алман сарны дор ханьсан ханьсан жаргая.

Дурлал хайрын галыг бадамлуулж чадсан энхрийхэн
Дуулим цэнхэр орчлонд дэлгэрч ургасан хонгорхон
Дуутай найргийн хойморт гэрэлтэх л ёстой үзэсгэлэн
Домогт гэгээн хайрын минь хатан нь болсон гоомарал.
БИ ЧАМД ХАЙРТАЙ . . .
2017-06-08

Г. Дашдорж "ҮҮР-БУЛАГ" яруу найргийн номноос