Тааттаҕа туризм сыла. Ыалдьыттары хоннорор, сынньалаҥнарын тэрийэр өҥө туруга

Таатта улууһа былыр- былыргыттан саха култууратын биһигинэн биллэр. Манна саха саарыннара, үгүс ахсааннаах биллэр-көстөр дьон уутуйан үөскээбит түөлбэлэрэ. Туристар интэриэстэрин тардар кэрэ бэлиэ сирдэр да үгүстэр. Ол да иһин буолуо, туризм хайысхатын сайыннарар сыаллаах 2019 сылы туризм сылынан биллэрбиттэрэ. Билигин маршруттары чопчулуур, ыалдьыттары хоннорор дьиэлэри тэрийии боппуруоһа турар
Улуус киинигэр дьону түһэрэр, хоннорор сир кыһалҕата өрүү баар. Маны туоратарга биирдиилээн предпринимателлэр ылсаллар да ол кыра. Элбэх ахсааннаах ыалдьыт кэлэр түгэнигэр интернатынан, пансионатынан түһэрии- боппуруоһу кылгас эрэ кэмҥэ быһаарыы буолар.
МАРИАННА МОСОРКИНА- «МОЙ БИЗНЕС» КИИН САЛАЙААЧЧЫТА
Хадаайы түмэлин дьоһун тутууларын, баай историятын сылга 13 тыһ кэриҥэ киһи көрөн-истэн ааһар. Ол иһиттэн 30-40 тас дойду дьоно, сорохтор анаан-минээн, атыттар ааһан иһэн хайаан да тохтоон астына-дуоһуйа билсэн бараллар. Кэлбит ыалдьыттарга биир бастакынан суунар-тараанар, сынньанар сир наада буолар.
МАРИЯ ТУЛАСЫНОВА- «ТААТТА» ЛИТЕРАТУРНАЙ ТҮМЭЛ НАУЧНАЙ СОТРУДНИГА
Бу күннэргэ Ытык Күөлгэ сонун дизайннаах, арҕааҥы дойдулардыы киэптээх гостиница баар буолла. 12 утуйар миэстэлээх, 6 хостоох дьоҕус тэрилтэ Даниловтар дьиэ кэргэн бизнестэрин саҥа хайысхата. Бүтүн дьиэ кэргэнинэн ис бараанын толкуйдаан, мебелин олохтоох уустарга оҥотторон ыалдьыттары көрсөргө бэлэмнэр
АЛЕКСАНДРА ДАНИЛОВА- ПРЕДПРИНИМАТЕЛЬ
Таатта сирэ-уота, ытык кэрэ сирдэрэ былыр да, быйыл да үгүс ыалдьыты үрдүк таһымҥа көрсөн турар. Тэтимнээх олоҕу кытта тэҥҥэ хардыылыыр, сайдыы саҕахтарын арыйсыы, туризм ырыынагын саҥа таһымҥа таһаарыы, өҥө хаачыстыбатын үрдэтии- олох ирдэбилэ буолла.