Högni gefur mannréttindum 12 stig

Herferð gegn mannréttindarbrotum í Aserbaísjan
Fjöldi íslensks tónlistarfólks hefur tekið höndum saman við Amnesty International um að gefa mannréttindum í Aserbaídsjan 12 stig og þrýsta á stjórnvöld í landinu vegna stórfelldra mannréttindabrota.

Friðsamir mótmælendur eru handteknir og beittir ofbeldi, blaðamönnum er hótað og þeim rænt, örðugt er að reka óháða fréttamiðla og sjálfsritskoðun er mikil. Stjórnvöld herða eftirlit með netnotkun og þrengja að tjáningarfrelsi á netinu. Yfirvöld vilja senda þau skilaboð að mótmæli almennings verði ekki liðin, né heldur nokkur tilraun til að sameina almenning í andstöðu við núverandi stjórnvöld.

Amnesty International, ásamt fjölmörgu íslensku tónlistarfólki, berst fyrir því að 14 samviskufangar, sem fangelsaðir voru í kjölfar mótmæla í Aserbaídsjan í fyrra, verði þegar í stað og skilyrðislaust leystir úr haldi og hvetur stjórnvöld í landinu til að leyfa röddum borgaranna að heyrast í aðdraganda Eurovision-söngvakeppninnar í Bakú í maí.