Dalurinn minn - Regína Ósk

Lag eftir Bjarna Hafþór Helgason
Ljóð eftir Hákon Aðalsteinsson úr bókinni Bjallkollu.
Myndband gert fyrir listsýninguna Fuglar Hugans 2021
Útsetning: Þórir Úlfarsson
Myndlistamaður: Ingvar Thor Gylfason
Dansari: Kata Vignis
Leikstjóri: Kristján Kristjánsson.

Dalurinn minn

Frið og yndi finn ég best
fram í dalnum grænum
og alltaf hlýnar hjartað mest
heima í gamla bænum.

Ungur marga átti þar
æskudaga bjarta
þar sem barnsins vagga var
vernduð móðurhjarta.

Jöklatign með fannaflekk
fellin græn og engið
þar sem lítill fótur fékk
fyrstu sporin gengið.

Megi tengja máttur þinn
mínar slitnu rætur
drottinn blessi dalinn minn
daga alla og nætur.