Баруун монголын гайхамшигт нутгаар-2020

Монгол улсын аялал жуулчлалын салбарын томоохон нөөц бүтээгдэхүүн газрын нэг бол яахын аргагүй Баруун хязгаар нутгийн байгаль, түүх, соёл, зан заншил, нүүдэлчдийн амьдралын өвөрмөц хэв маяг юм. Энэхүү гайхамшигт нутгуудтай хүүхэд залуучууд, иргэд, аялагч нарыг танилцуулах, төрсөн нутгаараа бахархах үзлийг төлөвшүүлэх, сурталчлах зорилгоор Мазаалай номадик тур аяллын компани нь Баруун Монголын гайхамшигт нутгаар аяллыг санаачилж амжилттай зохион байгууллаа. Нэн ялангуяа тус аяллын хувьд манай орны хамгийн өндөр цэг Алтай таван богд, хамгийн том нуур Увс нуур, Хангай нурууны ноён оргил Отгонтэнгэр, Хар ус нуур, Цамбагарав, Хархираа, Түргэн, Мухар элс, Толбо нуур гэх мэт Монголдоо онцлог газруудаар аялснаараа онцлог байлаа. “Баруун Монголын гайхамшигт нутгаар-2020” байгалийн адал явдалт аялал 07 дугаар сарын 12 – 22 ны хооронд 10 шөнө / 11 өдрийн туршид адал явдалтай, инээд наргиантай, дурсамж дурдатгалтай сайхан зохион байгуулагдлаа. Манай энэ удаагийн аялалд нийт 47 хүн оролцож найман настай балчраас эхлээд идэр залуучууд, ахмад буурлууд оролцлоо. Аяллын хувьд байгаль болон техникийн олон сорилт бэрхшээлтэй тулж байсан ч бид хамтдаа даван туулж аяллынхаа ард гарч чадлаа. Аяллын туршид хамтдаа байж чадсан аялагч, зохион байгуулагч болон жолооч, хөтөч, тогооч нартаа баярлалаа.
Хүндэтгэсэн: Мазаалай номадик тур