Оюутнууд төлбөрийн зөрүүгээ заавал төлнө

Монгол улсын их сургууль /МУИС/-ийн төгсөх курсийн 200 орчим оюутан сургуулиа төгсч чадахгүйд хүрчээ. Шалтгаан нь сургуулийн захиргаанаас нь нэг, хоёрдугаар курсд үзсэн илүү хичээлийнхээ төлбөрийг төл, түүний дараа төгсөгчдөд тойрох хуудас зурж, бичиг баримтыг нь хүлээлгэн өгнө гэсэн шаардлага тавьжээ. Гэтэл энэхүү шаардлагыг төгсөгч оюутнуудын зүгээс эсэргүүцэж, сургуулийн захиргаа, төлөөлөн удирдах зөвлөл сургалтын системээ алдаатай шинэчилчихээд илүү төлбөр нэхсэн гэж үзэж байна. Жишээлбэл, Г.Анударь МУИС-ийн Шинжлэх ухааны сургуулийн дөрөвдүгээр дамжааны оюутан. Тэрбээр 75 мянган төгрөгийн төлбөрийн өрөнд оржээ. Учир нь 2011 онд сургалтын систем шинэчлэгдэхэд сургуулийн зүгээс ерөнхий эрдмийн хичээлийг автоматаар сонгож өгсөн. Гэвч хоёр жилийн дараа буюу төгсөхөд илүү үзсэн нэгээс хоёр багц хичээлийн төлбөр нэхэх болсон гэж ярьлаа.

Харин сургуулийн захиргаа арай өөр байр суурь илэрхийлж байна. Тодруулбал 2010 он буюу МУИС-ийн хичээлийн хуучин системийн үед оюутны дөрвөн жилд үзэх хичээлийн нийт багц цаг (кредит)-ийг тооцож түүнийгээ жил бүр хуваан төлдөг байсныг “сиси” систем буюу хичээлийн цахим сонголтонд шилжсэн. Нэг оюутан улиралд 12 жилд 24-42, дөрвөн жилд 120 багц цагийн хичээл үзсэн байх ёстой. Өөрөөр хэлвэл оюутанууд өөрсдийнхөө чадварт тааруулж багцаа сонгон багц цаг тутамдаа төлбөр төлнө. Гэвч дээрх оюутнууд эхний хоёр жилд үзсэн багц цагаа илүүдүүлчихээд төлбөрөө төлөөгүй яваа. Жил бүр сургуулийн захиргаанаас оюутануудад төлбөрөө төлөх шаардлага тавьдаг ч өдий хүрсэн тухай мэдэгдлээ.

Өөрөөр хэлвэл 2011-2012 оны сургалтын системийн шинэчлэлтийн үед зарим салбар сургуулиуд сургалтын төлбөрөө хичээлийн жилээр буюу оюутан жилд дунджаар 30 багц судална гэж тооцож авчээ. Гэвч гүйцэтгэлийн үзүүлэлтээр зарим оюутнууд 30-аас илүү багц цаг судалсан байснаас судалсан хичээлийн багц цагийн төлбөрийн зөрүү ийнхүү үүссэн байна. Иймээс сургуулийн удирдлагууд заавал төлбөрийн зөрүүг оюутнууд барагдуулах ёстой гэдгийг тодотголоо.