Türkiyə ilə bağlı mühüm gəlişmə, Ərdoğana cavab, Osmanlı dövründə… - Xəbər saatı

#xəbər #Azərbaycan #sonxəbər
Anons:
1. Güclü yağış Bakıda problemlər yaratdı
2. Makrondan Osmanlı iddiası
3. Avtovağzallarda bu şəxslərə bilet satışı qadağan ediləcək
4. Bayden Ərdoğana cavab verdi
5. Putin-Ərdoğan görüşü öncəsi gərginlik pik həddə

1. Paytaxtda güclü yağış nəticəsində bir sıra küçələr su altında qalıb.
Şəhərin Süleyman Sani Axundov və digər küçələri su altında qaldığından keçilməz olub. Bundan başqa, Abay Kunanbayev küçəsində “Bolluq” adlanan ərazidə mağazaları su basıb, səkilər yağış sularının altında qalıb. Yollarda yaranan su gölməçələri avtomobillərin hərəkətində çətinliklər yaradıb.
Binəqədi rayonunun bəzi yaşayış məntəqələrində elektrik enerjisinin verilişində müvəqqəti məhdudiyyətlər yaranıb.
Yoldakı sel sularını çəkmək üçün əraziyə heç bir texnika cəlb olunmayıb. Bundan əlavə, adi günlərdə ərazidə xidmət göstərib sürücüləri haqlı-haqsız cərimələyən yol hərəkətini tənzimləyən Dövlət Yol Polisinin əməkdaşları da gözə dəymir.
FHN-nin günlər əvvəl xəbərdarlıqlarına baxmayaraq Binəqədi Rayon İcra Hakimiyyəti məsələyə hələ də laqeyd yanaşır. Yollarda yağış ötürücü kanalizasiya xətti yoxdur.
2. “Yunanıstan vaxtilə Osmanlı İmperiyası ilə mübarizə apararaq Avropanın qəlbində özünə yer etdi”.
Bunu Yunanıstan Baş naziri Kiriakos Miçotakislə görüşündə Fransa Prezidenti Emmanuel Makron deyib.
Makron Yunanıstanın qədim mədəniyyətə sahib olduğunu, Fransanın da bu səbəbdən onu dəstəklədiyini bildirib.
Yunanıstanın Osmanlı İmperiyasına qarşı mübarizə apararaq Avropanın qəlbində özünə yer etdiyini deyən Makron bunun Avropa tarixində bir ilk olduğunu və qitə üçün çox şey ifadə etdiyini söyləyib.
3. Oktyabrın 1-dən avtovağzallardan rayonlara və Bakıya səyahət edən sərnişinlərdən COVID-19 pasportu tələb ediləcək.
Bunu Dövlət Avtomobil Nəqliyyatı Xidmətinin mətbuat xidmətinin rəhbəri Nuridə Allahyarova deyib.
O bildirib ki, bununla bağlı bütün avtovağzallara tapşırıq verilib: "Bilet satışı zamanı sərnişindən COVID-19 pasportu tələb olunacaq. Pasportu olmayan sərnişinə bilet satılmayacaq".
4. ABŞ Prezidenti Co Bayden Türkiyə Prezidenti Rəcəb Tayyib Ərdoğanın son açıqlamasına reaksiya verib.
Bir neçə gün öncə Prezident Ərdoğan Türkiyənin Rusiyadan növbəti partiya S-400 kompleksləri alması haqda suala cavabında deyib ki, bu komplekslər alınacaq.
Ərdoğan həmçinin qeyd edib ki, təhlükəsizliklə bağlı kimdən nə silah alınacağına dair qərarı özümüz veririk.
ABŞ Prezidenti Bayden isə Türkiyənin Rusiyadan S-400 kompleksi alması haqda suala bir cümlə ilə cavab verib.
“Bu mövzuları çoxdan keçdik”, - Bayden bildirib.
5. “Rusiya Putin-Ərdoğan görüşündən əvvəl Suriyada Türkiyəyə qarşı təzyiqləri artırmağa çalışır”.
Bunu türk siyasi ekspert Məhmət Acət deyib.
Ekspert rusların Soçi görüşündən əvvəl İdlibdəki bu hücumlarla əlini gücləndirməyə çalışdığını bildirib:
“Havadan edilən hücumlara baxmayaraq indiyə qədər quru əməliyyatının aparılmaması, bu gərginliyin daha da uzağa getməyəcəyinə işarədir. Amma Rusiya və Əsəd rejimi quru əməliyyatlarına keçsə, bu, İdlibdə gərginliyin yenidən qızışacağı anlamına gələcək”.