Жэн Псаки: Муҳаммад Бекжон тиббий муолажага муҳтож

Ўзбекистонда 15 йилдан буён қамоқда қолаётган таниқли журналист Муҳаммад Бекжон масаласи илк бор АҚШ Давлат Департаментининг "Матбуотни озод қилинг!" деб аталувчи йиллик матбуот йиғинида тилга олинди. 60 ёшли Муҳаммад Бекжон 1999 йил 16 февраль портлашларига алоқадорликда айбланиб, 12 йилга озодликдан маҳрум қилинган ва 2012 йилда унга яна 5 йил қўшиб берилган.

Вашингтонда уюштирилаётган "Матбуотни Озод Қилинг" номли кампания доирасида АҚШ Давлат Департаменти матбуот вакили Жэн Псаки 28 апрель куни журналистлар билан суҳбатда эътиборни Муҳаммад Бекжон тақдирига қаратди.

- Муҳаммад Бекжонов 1999 йилдан буён қамоқда қолаётган ўзбекистонлик журналистдир. Бекжонов Журналистларни ҳимоя қилиш қўмитасига кўра, дунёдаги энг узоқ қамоқда қолаётган журналистлардан. 2012 йилда Бекжонов озодликка чиқиш вақти келганида қамоқхона тартибини бузганлик айби билан унга беш йиллик қамоқ муддати қўшиб берилди. Унинг соғлигига сўнгги 15 йил мобайнида жиддий путур етди. У ҳозир зудликда тиббий муолажага муҳтож. Ўзбекистон ҳукуматини зудликда унга тиббий ёрдамни кўрсатишга чақирамиз, - деди Псаки.